Müəllimlər şagirdlərin yay məktəbində iştirakına mane olur

“Yay məktəbinin tətbiq edilməsi çox vacib və zəruri idi, çünki pandemiya dövründə tələbələr, şagirdlər tədris prosesindən kifayət qədər kənarda qaldılar”.

Bunu Reyting.az-a təhsil eksperti Kamran Əsədov deyib. O bildirib ki, ölkə ərazisində 2020-ci ilin mart ayından etibarən tədrisin təşkilində format dəyişərək ənənəvi təhsildən məsafədən təhsilə keçirilib, bu da şagirdlər üçün təhsilin əlçatanlığına təsir göstərib: “Məhz buna görə yay məktəbləri təşkil edilməli idi. Çünki şagirdlər təkcə kompüter, planşet, telefon olmadığına görə təhsildən kənarda qalmayıblar, eyni zamanda müəyyən fənlər var ki, misal üçün, riyaziyyat, fizika, kimya - bu kimi fənləri məsafədən tədris etmək, demək olar ki, mümkün deyil. Ona görə hesab edirəm ki, yay məktəblərində şagirdlərin iştirakı vacibdir. Bir sözlə, əsas mahiyyət ondan ibarətdir ki, bir il dörd ay ərzində keçirilməyən və yaxud zəif keçirilən, eyni zamanda şagirdlər tərəfindən mənimsənilməyən və ya zəif mənimsənilən mövzular həmin iki həftəlik dərs müddətində hər gün məktəbə getməklə tədris olunacaq. Onu da qeyd edim ki, burada yalnız 1-10-cu sinif şagirdləri iştirak edəcəklər”.

Ekspert pandemiya dövründə şagirdlərin istər bilik, istər fiziki, istərsə də psixoloji baxımdan çox gərgin dövr keçirdiyini qeyd edib. Onun sözlərinə görə, heç kim şagirdləri daş daşımağa, pambıq yığmağa, su daşımağa zorla aparmır:

“Uşaqlar bir il ərzində tədrisdə zəif keçirilən mövzuları təkrar oxuyacaq. Şagirdlərimizin bu vəziyyətdə yuxarı sinifə keçməsi onlara ciddi problemlər yarada bilər. Bir məqamı qeyd edim ki, orta təhsildə ən az dərs həftəsi Azərbaycanda tətbiq olunur. Bir çox ölkələrdə hətta bizim dərs müddətindən bir ay artıq, 15 gün, 20 gün çox dərs günü tətbiq olunur. Dərs ilinin uzadılmasını normal qiymətləndirirəm. Çünki bu, bizim məktəblilərin yay tətil müddətini bir o qədər də qısaltmır. Konkret olaraq yenə də iki ay yarım məktəblilərin yay tətili qalır. Bu qərar şübhəsiz ki, pandemiya dövrünün dərslərə verdiyi fəsadlarla bağlıdır. İnsanlar narahatdır ki, iyun ayında havanın temperaturu 40 dərəcəyə qədər yüksəlir. Amma etiraf edək ki, bu vaxtı şagirdlər evdə olmurlar. Küçədə, məhəllədə oynayırlar. Digər tərəfdən, yay məktəbində cədvəlin səhər saatlarında olması şagirdlər üçün isti hava problemi yaratmır”.

K. Əsədov bildirib ki, yay məktəbinin vacibliyini və əsas mahiyyətini başa düşməyən bəzi müəllimlər özlərinin yay tətilində istirahətlərinin pozulmaması üçün şagirdlərin yay məktəbində iştirakına mane olmağa çalışıblar:

“Bu, daha çox Mərkəzi Aran rayonlarındakı məktəblərdə baş verib. Bu, çox yanlış addımdır. Hesab edirəm ki, bu məsələ ilə bağlı ciddi addım atılmalı idi. Xüsusən gənc müəllimlər paytaxt Bakıdan və ya bir bölgədən digərinə işləməyə gedənlər iyunun 14-dən sonra öz istirahətə gedirlər. O müəllimlər şagirdlərin məktəbə gəlməsinə mane olmağa başlayıblar və onlar imkan vermirdilər ki, uşaqlar yay məktəbində qeydiyyatdan keçsinlər. Biz bunu yeni işə qəbul olunmuş müəllimlərin timsalında gördük. Yay məktəbində iştirak könüllüdür, amma müəllimlər məcburi olaraq orada iştirak etməlidirlər. Hesab edirəm ki, bu hala yol verən müəllimlər inzibati qaydada tənbeh olunmalıdır. Təəssüflər olsun ki, istər Bakıda, istərsə də bölgələrdə şagirdlərin yay məktəbində iştirakı ilə bağlı müəllim arasında istər sosial şəbəkələrdə, istər digər platformalarda ciddi narazılıqlar, şagirdlərin dərslərdə iştirakına mane olmaq cəhdlərinin şahidi oldum. Düşünürəm ki, növbəti illərdə yay məktəbində iştirak məcburi olmalıdır".

Reyting.az

Ana səhifəyə dön