Abel Məhərrəmov borclu olduğu şəxslərə 800 min manatdan artıq vəsait ödəməlidir

Bakı Dövlət Universitetinin (BDU) sabiq rektoru, AMEA-nın üzvü Abel Məhərrəmov villalarında, restoranlarında və bağında işlətdiyi ustaların pullarını vermir. Bu səbəbdən də A. Məhərrəmova qarşı məhkəmədə iddia qaldırılmışdı. Artıq işi üzrə məhkəmə qərarının elan olunduğu bildirilir. Reyting.az xəbər verir ki, məhkəmə qərarına görə, A. Məhərrəmov borclu olduğu şəxslərə 800 min manatdan artıq vəsait ödəməlidir.

Gununsesi.info məhkəmə sənədlərinə istinadla xəbər verir ki, Yasamal Rayon Məhkəməsində İsimxan Mirzəyev və bir neçə nəfərin iddiası üzrə keçirilən məhkəmədə Abel Məhərrəmovun işlətdiyi usta və fəhlələrin pullarını vermədiyi üzə çıxmışdı.

Belə ki, Bakı şəhəri, Süleyman Dadaşov küçəsində 4 mərtəbəli villa inşa etdirən Abel Məhərrəmov müqaviləyə əsasən 71 ədəd pilləkənin hazırlanması və quraşdırılmasına görə 21300 (iyirmi min üç yüz) manat (bir ədədi 300 manatdan), mansardın quraşdırılmasına görə 15000 (on beş min) manat, qapıların hazırlanması və quraşdırılmasına görə dəyəri 20000 (iyirmi min) manat, şəbəkənin (reşyotkanın) hazırlanması və quraşdırılmasına görə 15000 (on beş min) manat, istilik sisteminin qarşısındakı alkovun (besedkanın) hazırlanması və quraşdırılmasına görə 10000 (on min) manat, sahəsi 30 kv.m olan barın quraşdırılmasına görə 9000 (doqquz min) manat (metri 300 manatdan), ümumi dəyəri 90300 (doxsan min üç yüz) manat olan işlərə görə ödməli olduğu vəsaiti ödəməyib.

Bundan başqa, sabiq rektor özünəməxsus “Mona Liza” şadlıq sarayında bar, mebel və s. işlər gördürüb. Buna görə də hesablanmış 70000 (yetmiş min) manatdan cəmi 25 min manat ödəyib.

Abel Məhərrəmov Mərdəkan qəsəbəsindəki bağ evində sahəsi 44 kv.m olan kitab və mətbəx mebellərinə görə də ödəniş etməyib.

Sabiq rektor daha sonra Bakı şəhəri, Şərifzadə küçəsindəki “Qlobus” bağçasında materialı ustalardan olmaqla ümumi dəyəri 80000 (səksən min) manat olan işlər gördürüb.

Burada qapıların, mebelin yığılması, çarpayıların və s. hazırlanmasına görə yalnız alınmış materialın pulu – 15000 manat ödənilib. Yerdə qalan 65000 (altmış beş min) manat ödənilməyib.

Məlumata görə, Abel Məhərrəmov ona etibar edən ustalara Nabrandakı iş zamanı da kələk gəlib.

Belə ki, Xaçmaz rayonunun Nabran qəsəbəsinin Seyidli ərazisində “El Faro” Ailəvi İstirahət və Əyləncə Mərkəzində ümumi dəyəri 15000 (on beş min) manat olan (bir ədədi 50 manatdan) 300 ədəd qapının quraşdırılması; 4000 kv.m sahədə ümumi dəyəri 160000 (yüz altmış min) manat olan (kvadrat metri 40 manatdan) üzləmə işlərinin icrası; mebellərin yığılması üzrə ümumi dəyəri 20000 (iyirmi min) manat; barların yığılması üzrə ümumi dəyəri 15000 (on beş min) manat olan işlərin icrasına görə, ödəməli olduğu 210000 (iki yüz on min) manat əvəzinə 40 ayda cəmi 24000 manat (yemək pulu) verib. A. Məhərrəmov bu günə kimi 186000 (bir yüz səksən altı min) manat ödəməyib.

Beləliklə, bir neçə epizod üzrə Abel Məhərrəmova qarşı 800 min manatdan artıq pul iddiası irəli sürülüb.

Dünən keçirilən məhkəmədə iddia təmin olunub.

***

Onu da qeyd edək ki, sabiq rektor Abel Məhərrəmovun qohumu İsmixan Mirzəyev yayılan məlumata münasibət bildirib. İ. Mirzəyev deyib ki, A. Məhərrəmova qarşı qaldırılan iddia təmin edilməyib. İ. Mirzəyev əlavə edib ki, iyunun 8-də Yasamal Rayon Məhkəməsində hakim Vahid Hacıyevin sədrliyi ilə keçirilən məhkəmə 4-cü baxışda iddianı rədd edərək işə xitam verib.

Ana səhifəyə dön