Baş həkim: “Başçının müavini Xalidə Bayramovadan heç yerə şikayət etməmişəm”

Dünən Baş Prokurorluq Səbail Rayon İcra Hakimiyyəti Başçısının birinci müavini Xalidə Nuru qızı Bayramovaya xəbərdarlıq edilməsi ilə bağlı məlumat yayıb. Məlumatda qeyd olunur ki, Xalidə Bayramovanın qanunsuz hərəkətlərə yol verməsi haqqında daxil olmuş məlumat əsasında Baş Prokurorluğunun Cinayət təqibindən kənar icraatlar idarəsində araşdırma aparılıb. Araşdırma zamanı müəyyən edilib ki, X. Bayramova öz vəzifə səlahiyyətlərindən istifadə edərək Səbail rayonu ərazisində yerləşən 1 saylı Şəhər Poliklinikasının vəzifəli şəxslərinə zəng vuraraq “COVİD-19” xəstəliyi əleyhinə vaksinasiya prosesi ilə əlaqədar yaxın qohumuna peyvənd vurulmadan peyvəndlənmiş şəxs kimi qeydiyyata alınaraq bu barədə tibbi sənədin verilməsini tələb edib.

Qeyd edilənlərlə bağlı Xalidə Bayramovaya Baş Prokurorluq tərəfindən xəbərdarlıq edilməklə, “Dövlət qulluqçularının etik davranış qaydaları haqqında” Qanunun tələblərinin pozulması səbəbindən barəsində qanuni tədbirlərin görülərək intizam məsuliyyətinə cəlb edilməsindən ötrü “Prokurorluq haqqında” Qanunun 23-cü maddəsinə əsasən Səbail Rayon İcra Hakimiyyətinə müvafiq təqdimat verilib.

Busaat.az saytı bu məsələdə adı hallanan 1 saylı Şəhər Poliklinikasının baş həkimi Kübra Cabbarova ilə əlaqə saxlayıb. Baş həkim bildirib ki, Səbail RİHB-nin birinci müavini Xalidə Bayramova ilə bağlı hər hansı orqana şikayət etməyib.

X. Bayramova

Baş həkim qeyd edib ki, hadisə fevral ayının 19-da yaşanıb: “Mənim bu məsələ ilə bağlı heç bir dövlət orqanına şikayətim olmayıb. Xalidə Bayramovanın bacısı gəlib bildirdi ki, məndə allergik reaksiya var və mən bu səbəbdən vaksinasiya olmaq istəmirəm. Mən də bildirdim ki, bununla bağlı 5 saylı xəstəxananın immunoloji bölməsi sizi müayinə edib rəy verməlidir. Yalnız bundan sonra siz vaksinasiya olunmaya bilərsiniz. Amma ümumiyyətlə, bu könüllüdür, istəmirsinizsə, gedin. Bütün bunlar icra hakimiyyəti və Səhiyyə Nazirliyi nümayəndələrinin yanında baş verib”.

K. Cabbarova bildirib ki, bu söhbətdən sonra X. Bayramovanın bacısı 19 fevralda birinci doza vaksinasiya olunub: “Bir ay sonra - 19 martda gəldi və dedi ki, məndə allergik reaksiya olub. Mən də dedim ki, bununla bağlı hara müraciət etmisiz, təcili yardım çağırmısınızmı?! O bildirdi ki, əlimdə səpkilər yaranıb. Mən bildirdim ki, bu, müxtəlif səbəblərdən ola bilər. Qeyd etdim ki, ikinci doza peyvəndlənmə olmalıdır. O sual verdi ki, mən də allergik reaksiya varmı? Mən bildirdim ki, bəli, izləri var. Bundan sonra o dedi ki, allergik səpkilər səbəbindən ikinci doza vaksinasiya olmaq istəmir. Biz də imtina kimi rəsmiləşdirdik.

Bizim xəstəxanada səhər saat 9-dan 18-dək icra hakimiyyəti və Səhiyyə Nazirliyinin nümayəndələri vaksinasiya prosesinə nəzarət edirlər. Başqa heç bir şey olmayıb və mən heç yerə müraciət etməmişəm. Kim bundan necə istifadə edirsə, özü bilər”.

Reyting.az

Ana səhifəyə dön