Opera tamaşası bakılıları niyə hiddətləndirib? - 100 ilin xəbərləri

Təxminən 120 il əvvəl çar Rusiyasının tərkibində olan Azərbaycanda nə baş verirdi? O dövrün qəzetləri nədən yazırdı?

Reyting.az oxucuları köhnəlmiş səhifələrddəki xəbərlərlə, keşmişə səyahətə çıxarır.

“Telefon”
5 yanvar 1908

BAKI. Balaxanıda fəhlələrə maaş paylamaq üçün 21.700 rubl aparan neft sənayeçisi Musa Nağıyevin kassiri Yudinə hücum edilib. Kassiri müşayiət edən atlı qorodovoylar təcavüzkarlarla atışmaya girib. Təcavüzkarlar qaçıb. Atışma yerində maskalar tapılıb.

“Russkoye slovo”
9 yanvar 1908

BAKI. [...] Milyonçu Tağıyev "anarxistlərdən" 40.000 rubl tələbnaməsi alıb. İmtina halında, "anarxistlər" Tağıyevi ölümlə hədələyirlər.

“Telefon”
6 fevral 1908

BAKI. Yeni qradonaçalnik general Folbaum yerli qəzetlərin bütün redaktorlarını dəvət edib və çıxışında onlara 17 oktyabr islahatlarını aparmaq üçün zehinləri sakitləşdirilməli olduğunu söyləyib. “Buna görə də, mətbuat yoxlanılmamış, səhv mesajlardan yayınaraq faktlara diqqətli yanaşmalıdır. Bu tələblərə cavab verən mətbuat məndə həmişə rəğbət oyadacaq. Səlahiyyətli bir nümayəndə olaraq bitərəf qalacaq və haradan peyda olursa-olsun, cinayətləri eyni dərəcədə təqib edəcəyəm”.

“Russkoye slovo”
11 fevral 1908

BAKI. Bir aylıq məzuniyyətə çıxmış və artıq dəmir yolu stansiyasına gedən keçmiş qradonaçalnik general Konevski Telefonnaya küçəsində 3 naməlum şəxsin hücumuna məruz qalıb. Qradonaçalnik və arvadı zərər çəkməyiblər. Bədəməllərlə mühafizəçilər arasında atışma baş verib. Nəticədə mühafizəçinin atı yaralanıb. Bədəməllər aradan çıxıb.

“Russkoye slovo”
18 fevral 1908

BAKI. Operetta truppasının "Məhəmmədin cənnəti" operettası barədə afişaları müsəlman əhali arasında böyük həyəcana səbəb olub. Bütün müsəlman mağazaları etiraz olaraq bağlanıb. Məscidlərə toplanan minlərlə insan operettanın repertuardan çıxarılmasını tələb edib. Hazırda operettanın ləğvi barədə vərəqələr yayılıb.

“Telefon”
28 fevral 1908

BAKI. Yolüstü Bakıdan keçən İrandakı türk səfiri Şəməddin bəy “Kaspi” əməkdaşına Türkiyə ilə Rusiya arasında müharibə barədə şayiələrin absurdluğunu və “Novoye Vremya”nın sensasiyalı yazısının uydurma olduğunu söyləyib. “İki dövlət arasında dost münasibətlər mövcuddur”.

Səfirin sözlərinə görə, İranla Türkiyə arasında müharibə gözləmək üçün heç bir səbəb yoxdur.

“Russkoye slovo”
4 mart 1908

BAKI. Rusiya və İrana məxsus saxta sikkələr hazırlayan yaxşı təchiz edilmiş bir sex aşkar edilib. Kuvikov qardaşları həbs olunublar.

"Bakinets"
16 mart 1908

“İndi Bakı həyatının bütün dünyada analoqu yoxdur. Təkcə yanvarın bir günü Bakıda qeydiyyata alınıb: adam öldürməyə cəhd - 7, yaralama - 40, qətllər - 52, silahlı soyğunçuluq - 71. Eyni zamanda, yaralanma və soyğun hadisələrinin hamısı polisə məlum deyil. Bakıdakı kimi bütün imperatorluqda belə bir cəhənnəm qaynasa, hər ay 34.000 qətl, 28.000 yaralama, 49.700 silahlı quldurluq olardı. Bu orgiya 18 ay davam etsəydi, yəni rus-yapon müharibəsi davam etdiyi müddətdə, 655.200 ölü və 504.000 yaralı olardı, ümumən 1 159 200 nəfər. Bu, yapon müharibəsi zamanı itirdiyimizdən tam üç dəfə çoxdur. Başqa sözlə, bakılılar bir-birlərini ən pis düşmənimiz olan yaponlardan 3 dəfə çox vəhşiliklə məhv edirlər.

Ana səhifəyə dön