Qəbul imtahanları ilə bağlı qeyri-müəyyənlik davam edir: DİM qərar verə bilmir

Koronavirus səbəbindən ölkəmizdə elan edilmiş xüsusi karantin rejimi ali və orta ixtisas təhsili müəssisələrinə qəbul imtahanlarının keçiriləcəyi tarixi də sual altına alıb.

Reyting.az-ın xəbərinə görə, Dövlət İmtahan Mərkəzinin (DİM) şöbə müdiri Nigar Hüseynova AzTV-nin efirində deyib ki, hazırda ali və orta ixtisas təhsili müəssisələrinə buraxılış və qəbul imtahanlarının tarixi barədə heç nə deyə bilmirlər. Çünki imtahanların tarixi Nazirlər Kabineti yanında Operativ Qərargahın qərarından asılıdır.

Onun sözlərinə görə, xüsusi karantin rejimi bitdikdən sonra DİM tərəfindən ali və orta ixtisas təhsili müəssisələrinə sənəd qəbulunun, qəbul və buraxılış imtahanlarının tarixləri açıqlanacaq:

“DİM ali və orta ixtisas təhsili müəssisələrinə sənəd qəbulunu hər zaman onlayn şəkildə keçirir. Biz hazırda sənəd qəbulunu həyata keçirə bilərik, ancaq sənəd qəbulu zamanı elə bir kontingent olur ki, onlar mütləq sənəd qəbulu komissiyasına gəlməlidirlər.

Məsələn, bir şəxs xaricdə orta təhsil alıb, təhsilini Azərbaycanda davam etdirmək istəyir. Bu barədə məlumat da bizim bazada mövcud olmur. Belə abituriyentlər Azərbaycanın ali və orta ixtisas müəssisələrinə qəbul imtahanlarında iştirak etmək üçün sənədlərini komissiyaya təqdim etməlidirlər”.

Şöbə müdiri qeyd edib ki, bu səbəbdən də xüsusi karantin rejiminin bitməsini gözləyirlər.

DİM-in mətbuat katibi Xanlar Xanlarzadə isə Modern.az-a bildirib ki, mövcud vəziyyətlə əlaqədar hələlik təxirə salınan imtahanların, eləcə də digər tədbirlərin hansı tarixdə keçiriləcəyi ilə bağlı indidən konkret fikir söyləmək doğru deyil: “Nazirlər Kabineti yanında Operativ Qərargahın qərarlarına uyğun olaraq hərəkət ediləcək və bu barədə ictimaiyyətə öncədən məlumat veriləcək”.

X. Xanlarzadə qeyd edib ki, hər şey epidemioloji vəziyyətdən asılıdır: “Krantin rejimi tam olaraq bitməlidir ki, gələcək planlar-imtahanların vaxtı və sairə məsələlər açıqlansın”.

DİM rəsmisi hamının bərabər şərtlər altında imtahan verəcəyini deyib:

“Onlayın imtahanlar barədə onu deyə bilərəm ki, bu il yalnız Azərbaycan dili istisna olmaqla, tədris dili digər dillərdə aparılan şagirdlər üçün Azərbaycan dili fənni üzrə onlayn imtahanın keçirilməsi nəzərdə tutulur. Hazırda bu istiqamətdə iş aparılır.

İmtahanın çətin və asan olacağına gəldikdə isə nəzərə almaq lazımdır ki, istər buraxılış, istərsə də qəbul imtahanları kolleclərə, ali məktəblərə daxil olmaq istəyənlərin bilik səviyyəsinə görə bir-birindən fərqləndirmək üçün keçirilir. Bu bir müsabiqədir. Burada hamı bərabər şərtlər altında eyni imtahanı verir”.

X. Xanlarzadə imtahan suallarında güzəştlərin nəzərdə tutulmadığını da qeyd edib:

“İmtahanda asan, orta və çətin tipli tapşırıqlardan istifadə olunur. Ona görə də imtahan suallarının asan və çətinlik dərəcəsində hər hansı bir dəyişiklik nəzərdə tutulmur. Müsabiqə şərtlərinin daha da aşağı salınması ilə bağlı onu deyə bilərəm ki, bu məsələ abituriyentlərin imtahan nəticələrindən asılı olur. Buna imtahanlardan sonra baxıla bilər.

İmtahanmların məzmunu ilə bağlı bildirmək istəyirəm ki, məktəblərdə mart ayından etibarən tədris prosesi dayandırılsa da, Təhsil Nazirliyi tərəfindən televiziyalar vasitəsilə teledərs, internet vasitəsilə “Virtual məktəb” onlayn dərslər keçirilir. Həmçinin, Dövlət İmtahan Mərkəzi də bu işə öz töhfəsini verib. Belə ki, DİM-in Youtube kanalında orta məktəb dərslikləri əsasında sinif və mövzular üzrə hazırlanan vizual dərslər yerləşdirilir. Düşünürəm ki, şagirdlər indiki vəziyyətdə bu imkanlardan maksimum istifadə etməlidirlər”.

Mətbuat katibi 11-ci sinif imtahanlarından da söz açıb:

“Hazırda 9-cu sinif buraxılış imtahanlarının birinci mərhələsi təxirə salınıb. Hansı ki bu imtahanların məzmunu mart ayına qədərki tədris dövrünü əhatə edirdi.

Təxirə salınan digər imtahanlar isə 11-ci sinif üzrə buraxılış imtahanlarıdır. Demək olar ki, burda da aprelə qədər mövzuların mənimsənilməsi yekunlaşmış olur. Həmçinin, bu imtahanlarda şagirdlərin bacarıqları, kompitensiyaları yoxlanılır. Bu bacarıqlar isə bütün həyatımız boyu 1-ci sinifdən 11-ci sinfə qədərki tədris boyu formalaşır. Hər hansı mövzudan, proqramdan asılı olmur.

İmtahanın ikinci mərhələsi isə hələ qabaqdadır. Mövcud vəziyyət, sadaladığımız tədbirlər təhlil olunacaq və bundan sonra Təhsil Nazirliyi tərəfindən tədris olunmayan mövzularla bağlı hər hansı müraciət olarsa, buna da uyğun müvafiq addımlar atılacaq”.

Reyting.az

Ana səhifəyə dön