ADR Hərəkatının sədr müavini koronavirusa qarşı xüsusi təkliflə çıxış edib

Azərbaycan Demokratiya və Rifah Hərəkatının (ADR) sədr müavini, Sumqayıt şəhərinin keçmiş baş həkimi, ictimai-siyasi xadim Səxavət Əlisoy koronavirusa (Kovid-19) yoluxmanın qarşısını almaq üçün xüsusi təkliflə çıxış edib.

Reyting.az-a daxil olan təkliflər bir neçə hissədən ibarətdir.

Aşağıdakı əhali qrupunun nəzarətə götürülməsi təklif edilir:

1. Azərbaycanda işləyən Çin vətəndaşları, onların çalışdıqları müəssisələrdə təmasda olduqları Azərbaycan vətəndaşları və ailə üzvləri;

2. Çinlə ticarət əlaqəsində olan və son iki ay ərzində ora səfər etmiş vətəndaşlarımız və onların ailə üzvləri;

3. Son iki ay müddətində Çin səfirliyinə müraciət edən vətəndaşlar və onların ailə üzvləri;

4. İldə bir neçə dəfə Kəskin Respiratot Virus Xəstəliyi (KRXİ) diaqnozu ilə poliklinikalara müraciət edən xəstələr (xüsusilə uşaqlar);

5. QİÇS və Hepatit C diaqnozu ilə qeydiyyatda olan xəstələr;

6. Narkomaniya ilə qeydiyyatda olanlar;

7. Qeyri-kafi mənzil şəraitində yaşayanlar;

8. 70 yaşdan yuxarı olan vətəndaşlar;

9. Uşaq və qocalar evlərində yaşayanlar;

10. Tənha və aztəminatlı vətəndaşlar.

Aşağıdakı tədbirlərin dövlət tərəfindən pulsuz həyata keçirilməsi təklif olunur:

1. 65 yaşdan yuxarı vətəndaşlar, tənha yaşayanlar, uşaq və qocalar evlərində qalanların maska və dezinfeksiya məhlulları ilə təminatı;

2. İlk mərhələdə 6, sonrakı mərhələdə 12 yaşına qədər uşaqlara profilaktik məqsədlə C vitaminin verilməsi;

3. Aztəminatlı, o cümlədən çoxuşaqlı ailələrə normal qidalanmaq üçün aylıq ərzaq paketlərinin verilməsi.

Tibb müəssisələrində:

1. Bakıda və böyük şəhərlərdə Virus hospitalları yaradılmalıdır. Bəzi xəstəxanalar və hökumətin sərəncamında olan tikililərdə bu hospitalları təşkil etmək mümkündür;

2. Dövlət və özəl tibb müəssisələri termal kamera ilə təmin olunmalı;

3. Hərarəti olan, şübhə yaradan xəstələr yalnız Virus hospitalına göndərilməli;

4. Xəstələrə ilk yardım tibb müəssisələrində deyil, Təcili və Təxirəsalınmaz Yardım stansiyalarının (TTTYS) həkimləri tərəfindən göstərilməlidir;

5. Poliklinikalarda sahə həkimləri TTTYS-in sərəncamına göndərilməli;

6. Yalnız həyat üçün zəruri olan və təxirəsalınmaz cərrahi əməliyyatlar keçirilməli, planlı əməliyyatlar müvəqqəti olaraq dayandırılmalı;

7. Doğum evləri xüsusi iş rejiminə keçirilməli;

Tibbi maarifləndirmə:

1. Dövlət və özəl TV-lərdə proqramların hər saatının 10 dəqiqəsi əhalinin koronavirusa qarşı önləm almasına ayrılmalı. Gündüz və axşam saatlarında mütəxəssislərin əhali ilə canlı təması üçün 2-3 saatlıq canlı yayımlar təşkil olunmalı;

2. Gigiyenik mədəniyyət səviyyəsinin yüksəldilməsi üçün xüsusi broşüralar və bukletlər çap olunub evlərə paylanmalı;

3. Şəhərlərin məqbul sayılan məkanlarında koronavirusla ilgili pannolar asılmalı.

Milli təhlükəsizlik üçün strateji olaraq:

1. Xüsusi virus laboratoriyaları təşkil olunmalı;

2. Aqrar sektorda idxal olunan toxumların ciddi virus müayinəsindən keçməsini təmin etməli;

3. Səhiyyə nazirliyi və TƏBİB idxal olunan dərman preparatlarının, xüsusən uşaqlar üçün nəzərdə tutulmuş peyvəndlərin yalnız xüsusi müayinədən sonra istifadəsinə icazə verməli:

4. Ölkəyə idxal olunan ərzaq məhsullarının virus müayinəsini təmin etməli;

5. Ərzaq istehsalı ilə məşğul olan dövlət və özəl sektor üzərində fövqəladə nəzarət təşkil olunmalı.

Ana səhifəyə dön