Hökumət sərnişinlərin problemini həll etməyə tələsmir

Yasin dayı hər gün Maştağadan Babək prospektində yerləşən iş yerinə uzun bir yol qət edərək gedib çıxır. Səbəbini belə izah edir ki, Maştağadan “Koroğlu” metrostansiyasına getmək üçün istifadə etdikləri yeganə istiqamət Sabunçu-Zabrat-Maştağa avtomobil yoludur. Həmin yolda isə səhər saatlarından başlayaraq uzun sürən tıxaclar insanların səbrini tarıma çəkir. İşə gecikməmək üçün sakinlər ən azı bir saat əvvəlcədən evdən çıxıb vaxtlarını tıxacda “öldürməyə” məcburdurlar. Avtobusla bu yolu hər gün qət edən vətəndaşlar isə daha çox əziyyət çəkirlər. Çünki bu istiqamətdə ancaq köhnə, istifadə müddəti başa çatmış avtobuslar xəttə buraxılır. Onlarda isə nəinki kondisioner, heç normal oturacaqlar da tapmaq olmur.

Yayın istisində tıxacda qalmaq insanların həm səhhətinə mənfi təsir edir, həm də günə gərgin başlamasına səbəb olur.

Axşam geri dönəndə də həmin yolda eyni vəziyyət hökm sürür. Bu səbəbdən avobuslarda sürücü-sərnişin davaları da qaçılmaz olur. Adətən yay aylarında işləyən vətəndaşların məzuniyyətdə olması, təhsil müəssisələrinin tətildə olması yollarda maşınların sayının azalmasına səbəb olur. Lakin Bakı kəndlərində istirahətə gedən sakinlərin bir qismi yay aylarında daha çox Sabunçu-Zabrat-Maştağa yolundan istifadə edirlər. Ona görə də bu yolda sıxlıq daim müşahidə edilir. Sakinlərin, sərnişinlərin çoxsaylı şikayətləri isə hələki cavabsız qalıb.

Qeyd edək ki, sözügedən magistral yolda hələ 2014-2015-ci illərdə əsaslı təmir işləri aparılıb, Sabunçu qəsəbəsinə giriş hissədə yolun az bir qismi genişləndirilib. Yolun sonadək genişləndirilməsi gözlənilsə də, bu baş vermədi. Əksinə, giriş hissədə genişləndirilmə işləri ilə əlaqədar kompensasiya müqabilində sökülən obyektlərin yerində yeniləri tikilib(?). Bu və digər səbəblər həmin yolda hərəkətin normal təşkilinə ciddi maneələr yaradır. Bəs bu sahəyə cavabdeh olan qurumlar nə düşünür? Yolun genişləndirilməsi və digər tədbirlər nəzərdə tutulurmu?

Hökumət sərnişinlərin problemini həll etməyə tələsmir

Anar Nəcəfli

Reyting.az-ın sualına cavab verən Avtomobil Yolları Dövlət Agentliyinin mətbuat katibi Anar Nəcəfli bildirib ki, yollarda hərəkətin təşkili bu qurumun səlahiyyətinə aid deyil. Ona görə də konkret fikir söyləməyib: “Bu məsələ Dövlət Avtomobil Yolları Agentliyinin səlahiyyətində deyil. Yol hərəkətinin təşkili və təhlükəsizliyinin təmin edilməsi ilə bağlı məsələlər Bakı Nəqliyyat Agentliyinin və Dövlət Yol Polisinin səlahiyyətindədir. Bununla bağlı hansısa təklif olarsa, icraçı olaraq bunu yerinə yetirə bilərik”.

Hökumət sərnişinlərin problemini həll etməyə tələsmir

Mais Ağayev

Bakı Nəqliyyat Agentliyini mətbuat katibi Mais Ağayev isə Sabunçu-Maştağa magistral yolunda yenilik ediləcəyini bildirib: “Bu yolda bu günə qədər yol hərəkətinin normallaşması ilə bağlı müxtəlif tədbirlər görülüb və bu işlər davamlı olaraq aparılır. Yaxın vaxtlarda ərazidə işıqforların vaxt rejimində müəyyən dəyişikliklərin edilməsi planlaşdırılır”.

Məsələyə nəqliyyat sektoru üzrə ekspert Azər Allahverənovun mövqeyini öyrəndik. Onun sözlərinə görə, bəzi məsələlər həll edilsə də, bu yolda tıxaclar qalmaqdadır:

“Sabunçu-Zabrat-Maştağa yolu artıq bir neçə ildir bizim sürücülərin gərgin, əsəbi olmasına səbəb olur. Eləcə də həmin ərazidə yaşayan insanların marağına zidd olan ab-hava yaranıb. Əvvəllər orada ən ciddi məsələ Sabunçu dairəsi ilə bağlı idi. Sabunçu dairəsindən Zabrata doğru gedən istiqamətdə fəaliyyət göstərən avtobus dayanacağı orada uzun sürən tıxacların yaranmasına gətirib çıxarırdı. Ona görə də 2015-2016-cı illərdə orada müəyyən işlər yerinə yetirildi, yerüstü piyada keçidi tikildi. Bundan sonra orada tıxacın həcmi azalsa da, problem tam həll olunmadı. Çünki həmin keçidin yanında avtobus dayanacağı fəaliyyət göstərirdi. Avtobuslar isə çox vaxt bu dayanacağa girə bilmirdilər, yolun ortasında saxlamağa məcbur olurdular. Çünki taksilər və digər kiçik minik maşınları orada park edilirdi”.

Hökumət sərnişinlərin problemini həll etməyə tələsmir

Azər Allahverənov

Bakı Nəqliyyat Agentliyivə Dövlət Yol Polisinin Sabunçu-Maştağa yolunda hətəkətin intensivlyini təmin etmək üçün müəyyən işlər gördüyünü xatırladan ekspert dayanacağın yerinin dəyişdirildiyini deyib. Bununla belə həmin yolda yenə də tıxac yaşanmaqdadır.

“Maştağaya doğrun hərəkət etdikdə yolun sağında çoxsaylı ticarət obyektləri fəaliyyət göstərdiyini müşahidə edirik. Onlar demək olar ki, piyada səkisinə bitişik yerləşiblər. Nəticədə həmin ticarət mərkəzlərinə, avtosalonlara gələn insanlar birbaşa yolun hərəkət hissəsində dayanmağa məcbur qalırlar. Yolun birinci zolağında əvvəlcədən park olunan avtomobillər də yer tutur. Buna görə bəzən sürücülər maşınlarını ikinci zolaqda saxlayaraq ticarət mərkəzlərinə gedirlər. Bu da yolun daralmasına, hərəkətin çətinləşməsinə gətirib çıxarır. 4 zolaqlı olan yol iki zolaqlı yola çevrilir. Bu da nəqliyyat vasitələrinin hərəkətini məhdudlaşdırır, intensivliyini azaldır. Nəticədə xoşagəlməz mənzərə yaranır”.

A. Allahverənovun fikrincə, həmin yolun genişləndirilməsi problemin aradan qaldırılmasına kömək edə bilər: “Harada imkan varsa, yolboyu genişləndirilmə fəaliyəti aparılmalıdır. Bununla yanaşı ticarət mərkzələrinin yaxınlığında qeyri-qanuni parklanmanın qarşısının alınması ilə bağlı işlər görülməlidir. Bu işdə foto və video qeydiyyatların aparılmasına malik olan cihazların da böyük rolu ola bilər. Əgər sürücülər bilsələr ki, həmin ərazilərdə onların qeyri-qanuni parklanmasını qeydə alan aparatlar quraşdırılıb və onlar buna görə cərimələnə bilərlər, o zaman qanunu pozmazlar. Digər tərəfdən, ticarət mərkəzlərinin rəhbərliyi alternativ dayanacaqlar təşkil etməlidir. Məsələ kompleks şəkildə həll edilsə, müsbət nəticə əldə edilə bilər”.

Onu da qeyd edək ki, Sabunçu-Maştağa yolunun Zabrat qəsəbəsindən keçən hissəsində çoxsaylı işıqforlar quraşdırılıb. Bu da ərazinin yaşayış massivi olması və sıx məskunlaşma ilə bağlıdır. Həmin işıqforların yerüstü keçidlərlə əvəzlənməsi və maşınların hərəkətinin intensivliyinin təmin edilməsi təklif edilir. A. Allahverənov bu məsələyə də münasibət bildirib:

“Həmin yolda piyadaların yüksək intensivliyi müşahidə edilir. Yolun hər iki tərəfində sıx məskunlaşma var. Ola bilər ki, hər 500-700 metr ara məsafəsi ilə yerüstü piyada keçidlərinin inşa olunması işıqforların sayının azalmasına, nəticədə avtomobillərin hərəkətinin intensivləşməsinə səbəb ola bilər. Bu problem uzun müddətdir müzakirə olunur. Düşünürəm ki, aidiyyəti strukturların bununla bağlı komissiyası olmalıdır. Komissiya müşahidələr aparmalı, rəylər öyrənilməlidir. Yol infrastrukturunun imkanları dəyərləndirilməlidir. Bu əsasda da konkret olaraq qərar qəbul edilməlidir”.

Reyting.az

Ana səhifəyə dön