726 şagird və abituriyentin qiymətinə dəyişiklik olundu

Tam (11 illik) orta təhsil səviyyəsi üzrə təhsilalanların biliyinin yekun qiymətləndirilməsi (attestasiyası) və ali təhsil müəssisələrinə qəbul imtahanlarının nəticələri ilə bağlı yaradılan Apelyasiya Komissiyası rəyini açıqlayıb.

Dövlət İmtahan Mərkəzindən (DİM) Reyting.az-a verilən məlumata görə, tam (11 illik) orta təhsil səviyyəsi üzrə təhsilalanların biliyinin yekun qiymətləndirilməsi (attestasiyası) və ali təhsil müəssisələrinə qəbul imtahanlarının nəticələri ilə bağlı yaradılan Apelyasiya Komissiyasına 1593 nəfər buraxılış imtahanları üzrə, 54 nəfər I qrup üzrə, 111 nəfər II qrup üzrə, 55 nəfər III qrup üzrə, 45 nəfər isə IV qrup üzrə olmaqla ümumilikdə, 1858 məzun və ya abituriyent (bütün imtahan verənlərin 1,11%-i) qiymətlərinin araşdırılması üçün ərizə ilə müraciət edib.

Bu müraciətlərdə buraxılış imtahanlarından 14000-ə yaxın, qəbul imtahanlarından isə 800-ə yaxın olmaqla ümumilikdə, 14800 (bütün yazı işlərinin 0,49%-i) yazı işi (tapşırıq) üzrə qiymətlərin araşdırılması üçün müraciət olunub.

Edilən bütün müraciətlər araşdırılmış və onları yazanlar dəvət edilərək iş üzrə birlikdə müzakirə aparılmışdır (regionlarda yaşayanlar ilə telefonla əlaqə saxlanılmış, apelyasiyanın nəticəsi bildirilmiş və müvafiq izahlar olunmuşdur). Apelyasiyaya müraciət edənlərdən 726 şagird və ya abituriyentin (bütün imtahan verənlərin 0,43%-i) cəmi 892 tapşırıq (bütün tapşırıqların 0,03%-i) üzrə qiymətində dəyişiklik edilib, digər iddialarla bağlı isə şagirdlərə yazı işinin yerinə yetirilməsində yol verdikləri səhvlər izah olunub. Təxminən, 70 işdə edilən düzəliş imtahan verənin tapşırığın həllini (və ya cavabını) başqa tapşırıq üçün ayrılmış yerdə yazması ilə bağlı meydana gələn hallara aiddir.

200-dən çox şagird və ya abituriyent bu və ya digər fənn üzrə bütün tapşırıqlarla bağlı müraciət etmiş, amma araşdırma zamanı məlum olub ki, müraciət etdikləri fənn üzrə heç bir yazı işini yerinə yetirməyiblər. 58 şagird və ya abituriyent ərizə yazmalarına baxmayaraq, apelyasiyada iştirakdan imtina etmiş və ya apelyasiyaya gəlməyib. Bununla belə, onların da ərizələri araşdırılmış və qiymətləndirmə meyarlarına uyğun qərarlar verilib. Həmçinin Apelyasiya Komissiyasının qərarı ilə 07 aprel 2019-cu il tarixində keçirilmiş imtahanın bir tapşırığının (B variantında 48 nömrəli, D variantında 47 nömrəli, F variantında 47 nömrəli, H variantında 47 nömrəli) qiymətləndirmə meyarına “hadisələri” sözü də doğru cavab kimi daxil edilmiş və həmin tapşırığı bu şəkildə cavablandıran 136 şagirdin nəticəsində müvafiq dəyişiklik edilib.

Abituriyentlərin nəzərinə çatdırırıq ki, qeyd olunan dəyişikliklər iyun ayının 25-dək onların imtahan nəticələri ilə əlaqədar yaradılmış səhifələrində öz əksini tapacaq.

Xatırladaq ki, buraxılış imtahanlarda 100 minə yaxın, dörd qrup üzrə qəbul imtahanlarında 67600-ə yaxın şagird iştirak edib və bu şagirdlərin ümumilikdə, 3 milyondan çox tapşırıq üzrə yazı işi yoxlanılıb.

Bununla da, 2019-cu il 7, 14, 21 və 28 aprel tarixlərində keçirilmiş qəbul (buraxılış) imtahanlarının birinci və 12, 19 mayda keçirilmiş ikinci mərhələsinin nəticələri ilə əlaqədar Apelyasiya Komissiyası öz işini yekunlaşdırıb.

Apelyasiya Komissiyası yay qəbul imtahanlarının nəticələri elan olunduqdan sonra yenidən fəaliyyətini bərpa edəcək. Lakin bütün abituriyent və valideynlərə bir daha müraciət edirik. Apelyasiya Komissiyasına müraciət etməmişdən öncə DİM-in internet saytında öz imtahan nəticələriniz, cavab vərəqəniz və qiymətləndirmə meyarları ilə tanış olun. Müraciətlərdən aydın olur ki, imtahan iştirakçıları öz yazdıqları ilə tanış olmayıblar. Hətta boş yazı işləri (200 nəfər) ilə əlaqədar müraciətlər var.

Bütün bunların araşdırılması Apelyasiya Komissiyasının işini ləngidir və lazımsız vaxt itkisinə səbəb olur. Məsələn, qəbul imtahanlarında iştirakçı sayı və cavab vərəqlərinə baxmış şəxslərin sayı aşağıdakı kimidir:

2019-cu il aprelin 7-də imtahan vermiş 27660 nəfərdən 13342-si, 14-də imtahan vermiş 28634 nəfərdən 8165-i, aprelin 21-də imtahan vermiş 22499 nəfərdən 4965-i, aprelin 28-də imtahanda iştirak etmiş 19486 nəfərdən 4220-si, mayın 12-də imtahan vermiş 32174 nəfərdən 6700-ü, mayın 19-da imtahan vermiş 35423 nəfərdən 7716-sı öz cavab vərəqinə baxıb.

Ana səhifəyə dön