Narkomaniya həyat fəaliyyətini pozur, sosial tənəzzülə gətirib çıxarır

Narkotik vasitələrdən istifadə gənclərin yalnız sağlamlığına deyil, mənəvi inkişafına da böyük zərər vurur. Bu zərərlərdən qorunmaq, ondan uzaqlaşmaq üçün gənclərin ailələrilə yanaşı, dövlət də, ictimai qurumlar da, təhsil müəssisələri də böyük işlər görməlidir. Dövlətlə yanaşı, vətəndaş cəmiyyətləri institutlarının da bu sahədə gördüyü işlər saysız-hesabsızdır. Təkcə AR Prezidenti yanında QHT-lərə Dövlət Dəstəyi Şurasının maliyyə yardımı ilə hər il onlarla tədbirlər, konfranslar, Dəyirmi masalar keçirilir. Bu tədbirlərin əhatə dairəsi təkcə Bakı şəhəri ilə yekunlaşmır, Azərbaycanın bütün bölgələrini əhatə edir.

Əlbəttə, gəncliyin həyatını, gələcəyini cəhənnəmə çevirən narkotikdən asılılıq böyük bir bəladır. Bu bəladan necə xilas olmağın yolları isə hamını düşündürür.

Təkcə ölkəmizi deyil, bütün dünyanı hədələyən narkotikdən can qurtarmaq üçün təbliğat işi davam etdirilməlidir.

Gəncliyin mənəviyyatına, sağlamlığına, müstəqil düşünmə qabiliyyətinə zərər vuran, cəmiyyət üçün yararlı olmasını əngəlləyən vasitələrdən biri narkotikdən istifadədir. Gənclərin müəyyən bir qisminin aludə olduğu bu zərərli vərdiş onların həyatını məhv edir, xoşbəxt gələcəklərini qara kölgə altında qoyur.

Azərbaycan dövləti, onun müvafiq qurumları, xüsusən də Daxili İşlər Nazirliyinin Baş Narkotiklərlə Mübarizə İdarəsi bu neqativ hala qarşı davamlı olaraq mübarizə aparır. Bu qurumun səyi nəticəsində bu sahədə xeyli iş aparılıb və aparılmaqdadır.

Narkomaniya elə bir bəladır ki, onun qarşısını bir neçə qurumun köməyi ilə almaq mümkün deyil. Bu işə ictimaiyyət, nazirlik və QHT-lər də yardım göstərməlidir. Bu zərurəti nəzərə alan dövlət qurumları bir neçə ildir ki, narkotik maddələrdən istifadəyə, onun satışı və yayılmasına qarşı mübarizə aparır, maarifləndirici tədbirlər həyata keçirir. Səhiyyə və Təhsil nazirlikləri müəyyən illərdə “Narkotiklərə YOX deyək!” devizi altında kampaniyalar keçirib və hazırda da proses müxtəlif layihələr adı altında davam edir.

Bu cür kampaniyaların keçirilməsində məqsəd gəncləri narkomaniyanın zərəri barədə məlumatlandırmaq və onların sağlam həyat tərzini formalaşdırmaq olub. Birgə aparılan kampaniyalarda gənclərə xüsusi töhfələr verilir. Gənclər öz aralarında müəyyən vaxtlarda internet və digər vasitələrdən istifadə edir, müxtəlif növ ünsiyyət saxlayırlar. Təbii ki, bu təbliğat kampaniyasında şagirdlər də bir-birini düzgün yola cəlb edəcək.

Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının işçi qrupunun rəhbəri Araz Əliquliyev də mətbuata açıqlamasında yeniyetmələr arasında uyuşdurucu maddələrdən istifadə hallarının artdığını narahatlıqla bildirib: “Onlar daha çox yapışqan, aseton, apteklərdə satılan bəzi reseptsiz dərmanlardan istifadə edirlər. Bunun qarşısını almaq üçün yeniyetmələr arasında maarifləndirmə işlərinin aparılması vacibdir ki, onları bu yola sürükləyənlərə “yox” deyə bilsinlər”.

Həkim Əli Nəcəfov bildirir ki, indiyə qədər görülən maarifçilik tədbirlərinin hər gün davam etdirilməsinə ehtiyac var: “Narkomaniya və pis vərdişlərdən uzaq olmaq məqsədilə məktəblərdə maarifləndirmə işləri aparılmalı, bununla bağlı gələcəyimizi narkomaniyadan qorumaq üçün lazımi proqram və layihələr televiziyalar tərəfindən geniş təbliğ olunmalıdır. Narkomaniya həyat fəaliyyətinin kobud surətdə pozulmasına və sosial tənəzzülə gətirib çıxaran ağır xəstəlikdir. Narkotik maddə təkcə onu qəbul edən insanı məhv etmir, həmçinin, narkomanın ailə üzvlərinin də sağlamlığına mənfi təsir göstərir, onların uşaqları fiziki və psixi çatışmazlıqlarla dünyaya gəlir”.

Həkimin sözlərinə görə, milli və hərbi vətənpərvərlik hislərinin gücləndirilməsində, milli dəyərlərimizin, sağlam həyat, sağlam ailə, mədəni irsimizin təbliğində gənclərin fəaliyyəti daha çox fayda verə bilər: “Əlbəttə ki, narkotik asılılığı olmayan, sağlam ruha və sağlam bədənə sahib bir gənc öz vətəni, milli kökü və dövlətçiliyimizin möhkəmləndirilməsi istiqamətində daha çox düşünə bilər”.

Biz də yuxarıda aparılan maarifləndirmə işləri haqda müəyyən məlumatları sizə xatırlatdıq. Əksər sahələrdə “narkotikə yox” devizi altında kampaniyalar keçirilsə də, hələ musiqi aləmindən bu təşəbbüsə qoşulanlar elə də nəzərə çarpmır. Rəssamlar, yazıçılar, jurnalistlər, fotoqraflar bu mübarizədə fəallıq göstərir. Amma şou-biznesdən bu kampaniyaya dəstək verənlər çox azdır. Narkotik maddələrə aludə olan bəzi gənclər özlərini bəzi narkotik istifadəçisi olan gənc şou-biznesçilərə bənzətmək istəyir. Bu ziyanlı tendensiyadır. Dövlət, əlaqədar qurumlar, QHT-lər, ictimaiyyət narkomaniyaya “rədd ol” deyir, amma bəzi şou müğənniləri, repçilər narkotiki təbliğ edir. Bu da gənclərin tərbiyəsinə mənfi təsir edir. Narkotiklə mübarizə sahəsində görülən tədbirlərə tanınmış insanlar dəstək verməlidir. Gənc sənətçilərin bu işdə fəallığı arzuediləndir. Azərbaycan dövlətinin, Azərbaycan ictimaiyyətinin gənclərin xilası, gələcəyi, onların vətənpərvərlik ruhunda tərbiyələnməsi üçün atdığı addımların xeyri olacaq. Gənclər özləri də bu məsələ ilə bağlı təbliğat aparmalıdır. Çünki bizim sağlam ruhlu, sağlam mənəviyyatlı gənclərə ehtiyacımız böyükdür.

L. Hüseyn

Bu yazı “Azərbaycan Milli İnkişaf layihəsi” İctimai Birliyinin Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə həyata keçirdiyi “Narkotik vasitələrdən və psixotrop maddələrdən istifadə edən şəxslərin sağlam həyat tərzinə qaytarılması üçün təbliğat və maarifləndirmə işinin təşkili” layihə çərçivəsində çap olunur.

Ana səhifəyə dön