Qərbi Azərbaycan məsələsi İstanbulda müzakirə olunub

Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Jurnalist Qadınlar Assosiasiyası (JQA) “Qərbi Azərbaycan: reallıqlar, perespektivlər” adlı layihə çərçivəsində işləri uğurla həyata keçirir.

Reyting.az xəbər verir ki, layihədə nəzərdə tutulduğu kimi, JQA-nın bir qrup əməkdaşı Türkiyənin İstanbul şəhərində səfərdə olub.

Jurnalist Qadınlar Assosiasiyasının təşkilatçılığı ilə İstanulda fəaliyyət göstərən “İstanbul Azərbaycan Kültür evində” “Qərbi Azərbaycan: gələcəyə baxış” adlı dəyirmi masa keçirilib.

Dəyirmi masada əslən Qərbi Azərbaycandan olan soydaşlarımız iştirak ediblər.

Dəyirmi masanı giriş sözü ilə açan “İstanbul Azərbaycan Kültür Evi”nin rəhbəri Hikmət Elp Qərbi Azərbaycanın tarixi barədə qısa məlumat verib.

Sonra JQA-nın rəhbəri Sevil Yusifova layihənin məqsəd və məramından geniş danışıb.

O, çıxışında tədbirin mövzusunun aktuallığına və əhəmiyyətinə toxunub.

Layihə rəhbəri bildirib ki, ötən əsrdə indiki Ermənistan dövləti tərəfindən Qərbi Azərbaycanda yaşayan soydaşlarımız deportasiyaya və soyqırıma məruz qalıblar: "Ermənilər hər fürsətdə millətimizə məxsus tarixi abidələri də yer üzündən silməyə çalışıblar. Əlimizdə olan rəsmi faktlara əsaslanaraq deyə bilərəm ki, əcdadlarımızın əsrlərboyu qoruyub saxladığı tarixi mədəni-mənəvi dəyərlərimiz də erməni vandalizmin qurbanı olub. Ermənilərin tək istəyi o olub ki, sonradan gəldikləri Azərbaycan torpaqlarında bizim millətə məxsus izləri silsinlər və qondarma tarix yaratsınlar. Təəssüf ki, ermənilər havadarlarının dəstəyi ilə bir çox məsələlərdə öz istəklərinə nail ola biliblər. Bizim tarixi abidələrimiz ya erməniləşdirilib, ya da məhv edilib".

Xanım Yusifova layihənin davamlı olmasını və Türkiyədə yaşayan Ermənistan ərazisindən deportasiya edilən insanlarımızın təşkilatlanmasının vacibliyini də vurgulayıb.

Dəyirmi masada söz alıb çıxış edənlər də mövzunun aktuallığından danışıblar.

Əslən İrəvandan olan dinləyicilər bildiriblər ki, ən son 1988-ci ildə yarım milyona yaxın Azərbaycan türkünü zorla yurdundan çıxardılmasına nail olan ermənilər soydaşlarımızın mal və mülklərinə də əl qoyub, onları özünküləşdırıb, yüzlərlə qadın, uşaq öldürülüb.

Natiqlər Ermənistanın illər boyu törətdiyi zorakılıq siyasəti, millətimizin başına gələn həqiqətlərin dünya ictimaiyyətinə çatdırlmasının vacibliyini söyləyiblər. Azərbaycanlıların öz yurduna, Vətəninə dönməsi üçün təminat verilməsi tələbinin irəli sürülməsini qeyd ediblər.

Tədbirdə beynəlxalq aləmin diqqətini hüquqları pozulmuş soydaşlarımızın haqlı tələblərinə yönəltməli olduğumuz dəfələrlə səsləndirilib. Həmçinin mədəni irsimizin qorunması və bu irsin yenidən canlandırılması yolları müzakirə olunub.

Sonda qərara alınıb ki, Türkiyədə yaşayan Ermənistandan zorla köç edən ikinci, üçüncü nəsil azərbaycanlı ailələrin övladları öz əcdadlarının mədəniyyətini qoruyub saxlamaq üçün Qərbi Azərbaycan məsələsini gündəmdə saxlamağa çalışsınlar.

Bundan başqa, Qərbi Azərbaycanın tarixini ğzündə əks etdirən faktların toplanması və əldə edilən sənədlər, məlumatların xarici dillərə tərcümə olunması kimi fəaliyyətlərin həyata keçirilməsi də tədbirin əsas mövzularından olub.