"MedEra" hospitalının uzman həkimi imtahanda keçid balını toplaya bilməyib

Musa Kılıç "MedEra" hospitalında çalışan uzman fizioterapevt-reabilitoloqdur.

Reyting.az-ın APA-ya istinadla məluatına gorə, o, 2018-ci ildən Bakıda fəaliyyət göstərir. Bioqrafiyasında qeyd olunub ki, 2008-2016-cı illərdə Tiflis Dövlət Tibb Fakültəsində bakalavr, magistr, doktorantura pillələri üzrə təhsil alıb.

Musa Kılıçın diplomunun saxta olması ilə bağlı iddialar

Bir müddət əvvəl sosial şəbəkədə Musa Kılıçın diplomunun saxta olması ilə bağlı xəbərlər yayılıb. Qeyd olunub ki, Gürcüstan universitetində təhsil alan həkimin xarici dil bilikləri sual altındadır və onun diplomları saxtadır. Bu xəbərlərdən sonra Musa Kılıç öz sosial hesabında təhsil səviyyəsi barədə paylaşım edib. Paylaşımda bildirib ki, ona Səhiyyə Nazirliyi tərəfindən həkim sertifaktı təqdim edilib.

Peşə ixtisasının tanınması və imtahan nəticəsi

Türkiyə Respublikası vətəndaşı uzman fizioterapevt Musa Kılıç peşə ixtisasının tanınması üçün Səhiyyə Nazirliyində keçirilmiş imtahana dəvət olunub, imtahanda müvafiq keçid balını toplaya bilmədiyi üçün uğursuz nəticə əldə edib və ona TKTA tərəfindən yalnız akademik tanınma şəhadətnaməsi təqdim olunub.

Bu barədə APA-ya Təhsildə Keyfiyyət Təminatı Agentliyindən məlumat verilib.

TKTA-nın rəsmi açıqlaması

"Martın 2-i sosial mediada Türkiyə Respublikası vətəndaşı Musa Kılıçın bakalavriat səviyyəsi üzrə Tbilisi Dövlət Tibb Universitetindən əldə etdiyi diplomun saxta olduğuna dair məlumat paylaşılıb və müvafiq qurum tərəfindən adıkeçən şəxsin kvalifikasiyasının tanınmadığına dair fərziyyə irəli sürülüb. Xarici kvalifikasiyaların tanınması üzrə məsul qurum olaraq Azərbaycan Respublikası Elm və Təhsil Nazirliyinin tabeliyində Təhsildə Keyfiyyət Təminatı Agentliyinin (TKTA) qeyd olunan məqamı aydınlaşdırmaq zərurəti yaranıb. Qeyd etmək istərdik ki, M.Kılıc “Fizioterapiya və tibbi reabilitasiya” ixtisası üzrə əldə etdiyi dövlət nümunəli (həqiqi) ali təhsil sənədi ilə xarici kvalifikasiyasının tanınması üçün TKTA-ya müraciət edib. M.Kılıçın müraciəti üzrə icraat Azərbaycan Respublikası Nazirlər Kabinetinin 2023-cü il 3 fevral tarixli, 34 nömrəli Qərarı ilə təsdiq edilmiş “Xarici dövlətlərin ali təhsilə aid kvalifikasiyalarının tanınması Qaydaları”na əsasən aparılıb. M.Kılıç peşə ixtisasının tanınması üçün Səhiyyə Nazirliyində keçirilmiş imtahana dəvət olunmuş, imtahanda müvafiq keçid balını toplaya bilmədiyi üçün uğursuz nəticə əldə etmiş və ona TKTA tərəfindən yalnız akademik tanınma şəhadətnaməsi təqdim olunub. Sözügedən şəhadətnamədə də qeyd olunduğu kimi akademik tanınma ərizəçiyə yalnız Azərbaycan Respublikası ərazisində təhsilin növbəti pilləsi (səviyyəsi) üzrə təhsilini davam etdirmək hüququ verir”, - açıqlamada qeyd olunub.

Akademik tanınma və onun hüquqi əhəmiyyəti

Bildirilib ki, qaydalara əsasən, xarici kvalifikasiya əldə etmiş şəxslərin Azərbaycan Respublikası ərazisində təhsilin növbəti səviyyəsinə qəbul olunmaq, həmçinin peşə fəaliyyəti ilə məşğul olmaq hüququ əldə edə bilməsi üçün müvafiq kvalifikasiyanın TKTA tərəfindən tanınması şərt olaraq qanunvericilikdə təsbit olunub.

Tənzimlənən ixtisaslar üzrə peşə tanınması

Əlavə olaraq qeyd etmək istərdik ki, tənzimlənən ixtisaslar kateqoriyasına aid olan müəllimlik, mühəndislik, hüquq, tibb və səhiyyə ixtisasları üzrə xarici kvalifikasiyaların peşə tanınması TKTA-nın sifarişi ilə müvafiq olaraq Azərbaycan Respublikası Dövlət İmtahan Mərkəzi (müəllimlik, mühəndislik, hüquq ixtisasları) və Azərbaycan Respublikası Səhiyyə Nazirliyi (tibb və səhiyyə ixtisasları) tərəfindən keçirilən imtahanlarda uğurlu nəticə göstərildiyi təqdirdə verilir.

Digər tərəfdən, akademik şəhadətnamə əldə etmiş ərizəçi tam (akademik və peşə) tanınma əldə etmək istədikdə, TKTA-ya elektron qaydada təkrar müraciət edərək Azərbaycan Respublikasının Nazirlər Kabineti tərəfindən müəyyən edilmiş məbləğdə xidmət haqqını ödəməklə təşkil olunan peşə tanınması imtahanında iştirak edir və müvafiq keçid balını topladığı təqdirdə tam tanınma əldə etmiş olur.

Məlumat üçün bildiririk ki, müraciətçilərə təqdim edilmiş şəhadətnamələrin həqiqiliyi https://edu.gov.az/az/yoxla keçidi vasitəsilə yoxlanıla bilər.

Ana səhifəyə dön