Bir milyon manatlıq dələduzluq - Zərərçəkmişlər ifadə verirlər

Talassemiyalı uşaqlar üçün toplanmış bir milyon manata yaxın vəsaiti dələduzluq yolu ilə ələ keçirməkdə təqsirləndirilən şirkət sahibi Nuridə Seyidova və digər iki nəfər – Aynur Bayramova və Aysel Məmmədovanın cinayət işi üzrə məhkəmə prosesi keçirilib.

Reyting.az "Report"a istinadla xəbər verir ki, Bakı Ağır Cinayətlər Məhkəməsinin hakimi Azad Məcidovun sədrliyi ilə keçirilən prosesdə zərərçəkmiş şəxs qismində Aynur Orucova ifadə verib.

O bildirib ki, oğlu talasemiyya xəstəsi olub:

"Hospitalda olanda Günel xanımın vasitəsilə Nuridə Seyidova və Aynur Bayramovanı tanımışdım. Günel xanımın özü də xəstələri aparırdı. O, məndən 20 min dollar pul istəmişdi. Bizim o qədər pulumuz yox idi. Günel xanım dedi ki, sponsorlar vasitəsilə Nuridə aparır. Biz də gedib Nuridə və Aynurla görüşdük. Bizim də cəmi 25 min manat pulumuz var idi. Həmin vaxt yataqxanadakı evimi satmışdım. Dedilər 25 min manatı dollar edin. Bizdə 15 min dollar elədik. Sonra Aynur mənə zəng elədi ki, pulu tez gətirin. Qaynatamla Çinar Plazaya getdik, pulu Aynurla Nuridəyə verdik. Pulu Toğrul sayıb götürdü".

Zərərçəkmiş qeyd edib ki, bir müddət sonra onları İstanbulda yerləşən Acıbadəm xəstəxanasına göndəriblər:

"Yoldaşım və uşaqlarımla birlikdə İstanbula getdik. Biletləri Aynur həll eləmişdi. Otelə yerləşdik, səhəri xəstəxanaya getdik. Analizləri verdik, 3500 dollar pul istədilər. Mən Nuridə ilə danışdım, məsələni həll elədilər. Xəstəxanadan dedilər ki, bir həftə ərzində pulu tam ödənilsə, uşağı xəstəxanaya qəbul eləyəcəklər. Bu barədə Nuridəyə dedim. Lakin bir ay ərzində pul ödənilmədi. Nuridə yalandan dedi ki, orda alınmadı, Antalyada "Medical Park"a göndərək. Razılaşmadıq. Dedik ki, Azərbaycana qayıtmaq istəyirik. Bir aydan çox orda qaldığımız üçün uşağım vəziyyəti daha da pisləşdi. Uşağım əməliyyat olunmadı. Hazırda 15 min dollarımı tələb edirəm".

Təqsirləndirilən Aynur Bayramova zərərçəkənin ifadəsinə etiraz edib və bildirib ki, zərərçəkən pulu verəndə otaqda olmayıb.

Hakim Aynur Bayramovaya xəbərdarlıq edib və yerindən danışmamağını tapşırıb.

Təqsirləndirilən Nuridə Seyidova isə bildirib k, 15 min dollardan 7 min dollar Acıbədəm xəstəxanasına ödənilib, 2-3 min dollar da ailənin otel və yemək xərclərinə ödənilib.

Daha sonra ifadə verən şahid Şəbnəm Qurbanova deyib ki, Aysel Məmmədova 2017-ci ildə "Nərgiz" fondunun tibbi şirkətlərinin birində vəzifədə olarkən onu tanıyıb: "Mənim övladımda talassemiya xəstəsi olub. O, Tallesimiya mərkəzində əməliyyat olunub. Lakin, müalicəyə pul çatdırmırdıq. O zamanlarda sosial şəbəkələrdə Aysel Məmmədovanın elanını görüb kömək istədim. O, dedi ki, ancaq əməliyyata kömək edə bilərlər. Amma Aysel Məmmədova şəxsi hesabına mənə kömək etdi. Onlara fonddan tanıdığım 2 nəfər talessimiya xəstəsinin valideynini göndərmişəm. Həmin valideynlər öəniş edərkən orada olmamışam. Aysel Məmmədova mənə əziyyətimin qarşılığı olduğunu bildirərək 1000 dolar pul verib. Həmin pulu da müstəntiq məndən alıb zərərçəkən Nərgiz və Şövkət arasında bölüşdürüb".

Növbəti proses martın 12-də davam edəcək.

Qeyd edək ki, talassemiyalı xəstələrin valideynlərinin Daxili İşlər Nazirliyinə müraciətindən sonra faktla bağlı cinayət işi başlanılıb. İstintaqla müəyyən edilib ki, Nuridə Seyidova digərləri ilə əlbir olaraq 36 nəfər talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 1 milyon manata yaxın dələduzluq edib.

Xanım müttəhimlərə qarşı Cinayət Məcəlləsinin 178.4-cü ( dələduzluq-xüsusilə külli miqdarda ziyan vurmaqla törədildikdə) maddəsi ilə ittiham irəli sürülüb.

Ana səhifəyə dön