MMC sakinlərə və FHN-ə problem yaradıb

Dünən Bakı şəhəri, Nərimanov rayonu, Əhməd Rəcəbli küçəsi, 5B ünvanında yerləşən texniki peşə məktəbinin 5-ci mərtəbəsində baş vermiş yanğın hadisəsinin şiddətlənməsi «Gold Residence» MMC-nin qanunsuz hasarlama fəaliyyəti nəticəsində Fövqəladə Hallar Nazirliyinin (FHN) yanğınsöndürmə maşınlarının əraziyə daxil ola bilməməsi ilə əlaqədardır.

Reyting.az xəbər verir ki, bunu sakinlər bildiriblər.

Onların sözlərinə görə, yanğının vaxtında qarşısının alınmaması səbəbindən məcburi köçkünlərin məskunlaşdığı 10 mənzil zərər görüb. Çünki «Gold Residence» MMC ərazini qanunsuz olaraq hasarlayıb və bunun nəticəsində FHN-nin yanğınsöndürmə texnikası vaxtında əraziyə daxil ola bilməyib.

Xatırladaq ki, Bakı Şəhər İcra Hakimiyyətinin 26 yanvar 2024-cü il tarixli, 11 nömrəli Sərəncamı ilə «Gold Residence» MMC-yə Nərimanov rayonu, Fətəli Xan Xoyski prospekti, 128, 130 və Əhməd Rəcəbli küçəsi, 5B ünvanlarında yerləşən 1,178 hektar ərazi 49 illik icarəyə verilib. Lakin MMC, sərəncamda göstərilən koordinatlardan kənara çıxaraq, Aşıq Molla Cümə küçəsi, 28 ünvanında yerləşən 9 mərtəbəli binanın həyətini də qanunsuz olaraq hasarlayıb. Nəticədə, həmin bina sakinlərinin Fətəli Xan Xoyski prospektinə çıxışı bağlanıb, onların hərəkət azadlığı məhdudlaşdırılıb. Bu qanunsuz hasarlama, həmçinin təcili yardım və yanğınsöndürmə kimi xüsusi təyinatlı nəqliyyat vasitələrinin əraziyə girişini çətinləşdirib.

Sakinlər dəfələrlə Nazirlər Kabinetinə, Dövlət Şəhərsalma və Arxitektura Komitəsinə, Bakı Şəhər İcra Hakimiyyətinə və digər aidiyyəti dövlət orqanlarına kollektiv şikayətlər ünvanlayıblar. Lakin bu müraciətlərə baxmayaraq, heç bir tədbir görülməyib. Sakinlər iddia edirlər ki, dövlət qurumlarının nümayəndələri «Gold Residence» MMC-nin ofisinə daxil olduqdan sonra, şikayətçilərin müraciətlərinə cavab vermədən ərazidən ayrılırlar. Həmin məmurlardan biri qanunsuz hasarlama işlərinin aparılması başlayarkən əraziyə gələn və sakinlərə yalan vədlər verən Eldəniz Əbdülovdur. O, İbrahim Əsədov adlı məmurla əraziyə gələrək sakinlərə bildirib ki, guya hasar COP29 görə çəkilir ki, şəhərimizə gələn qonaqlar sökülməsi nəzərdə tutulan yararsız binaları görməsinlər. Lakin, sonradan bəlli olub ki, hasar MMC ilə icra hakimiyyətinin birgə qanunsuzluqları pərdələmək üçün çəkilib.

Qeyd edək ki, Azərbaycan Respublikasının Konstitusiyasının 33-cü maddəsinə əsasən, hər kəsin mənzil toxunulmazlığı hüququ var. «Gold Residence» MMC-nin qanunsuz hasarlama və söküntü işləri, sakinlərin mənzil toxunulmazlığı hüququnu pozmaqla yanaşı, onların hərəkət azadlığını da məhdudlaşdırır. Bundan əlavə, Cinayət Məcəlləsinin 188-ci maddəsinə (torpaq üzərində mülkiyyət, istifadə və ya icarə hüququnu pozma) və 308-ci maddəsinə (vəzifə səlahiyyətlərindən sui-istifadə) əsasən, belə qanunsuz əməllər cinayət məsuliyyəti yaradır.

Sakinlər, «Gold Residence» MMC-nin qanunsuz fəaliyyətlərinə son qoyulmasını, Aşıq Molla Cümə küçəsi, 28 ünvanında yerləşən binanın Fətəli Xan Xoyski prospektinə çıxışının bərpa edilməsini və qanunsuz hasarların sökülməsini tələb edirlər. Həmçinin, binanın zədələnmiş kanalizasiya sisteminin təcili olaraq bərpası üçün aidiyyəti dövlət qurumlarının dərhal tədbir görməsini istəyirlər.

Bu hadisə, şəhərsalma və tikinti sahəsində qanunvericiliyin tələblərinə əməl etməyin vacibliyini bir daha göstərir. Qanunsuz tikinti və hasarlama işləri, sakinlərin hüquqlarının pozulmasına və fövqəladə hallarda ciddi fəsadlara yol aça bilər. Bu səbəbdən, müvafiq dövlət qurumları tərəfindən belə halların qarşısının alınması və qanun pozuntularına yol verən şəxslərin məsuliyyətə cəlb edilməsi zəruridir.

V. QULİYEV

P.S. Dünənki yanğın hadisəsindən əvvəl də adıçəkilən ərazidə belə bir hadisə baş vermişdi. Həmin vaxt da yanğınsöndürənlərin əraziyə daxil olmasında çətinliklər yaranmışdı: My Webpage

Ana səhifəyə dön