Həbsdəki blogerin həyatına təhlükə yaranıb

“Sərhədsiz Reportyorlar” həbsxanada olan azərbaycanlı bloger Mehman Hüseynovun səhhətilə bağlı narahatdır.

Reyting.az-ın xəbərinə görə, “Sərhədsiz Reportyorlar” beynəlxalq təşkilatının dekabrın 31-də yaydığı bəyanatda deyilir ki, yeni uydurma ittihama etiraz olaraq, M. Hüseynovun aclıq aksiyası keçirməsi - maye və qida qəbulundan imtina etməsi onun vəziyyətini kritik həddə çatdırıb.

Təşkilat Azərbaycan hakimiyyətini yeni ittihamı götürməyə və blogeri dərhal azad etməyə çağırıb.

"Yeni ittiham barədə ona məlumat verildikdən sonra başladığı aclıq nəticəsində M. Hüseynovun səhhəti hər gün pisləşir. O, maye qəbul etmir. 2019-cu ilin martında azaldığa buraxılmalıydı. Ancaq hazırda guya onu həbsxana mühafizəçisini döydüyünə görə əlavə olaraq yeddi il cəza gözləyir", - bəyanatda deyilir.

Dekabrın 26-da karserə salındıqdan sonra vəkilləri dekabrın 28-dək ona baş çəkə bilməyiblər. O, artıq zəifləyib, kənar yardım olmadan yeriyə bilmir.

Vəkilləri bildiriblər ki, dekabrın 30-da ona iynə vurublar, ancaq iynənin mənşəyini aydınlaşdırmalıdırlar.

"Mehman Hüseynovu ölüm təhlükəsi gözləyir və biz onun taleyinə görə məsuliyyəti Azərbaycan hakimiyyətinin üzərinə qoyuruq", - SR Şərqi Avropa və Mərkəzi Asiya şöbəsinin rəhbəri Yohan Bir deyib. "Biz blogerin təcili azad edilməsinə və onun üzərindən yeni ittihamların götürülməsinə çağırırıq. Beynəlxalq birlik bu məqsədə çatmaq üçün mümkün olan hər şeyi etməlidir", - Y.Bir əlavə edib.

Qeyd edək ki, M. Hüseynov rejimi tənqid etməsi və yüksək səviyyədə korrupsiyanı ifşa etməsilə tanınır.

O, həmçinin hakimiyyət tərəfindən dəfələrlə təqiblərə məruz qalmış kütləvi informasiya vasitələrinin müdafiəsilə məşğul olan Reportyorların Azadlıq və Təhlükəsizlik İnstitutunun (RATİ) prezidentidir.

Hazırda RATİ-yə onun qardaşı və həmkarı, mühacirətdə olan Emin Hüseynov rəhbərlik edir.

RATİ-nin direktoru E. Hüseynov “Turan” agentliyinə deyib ki, dünən M. Hüseynovla telefonla danışıb:

“Quru aclığın beşinci günündə Mehmanın halı pisləşib. Mehman damarların varikoz genişlənməsindən əziyyət çəkir, bədənin susuzlaşmasından demək olar ki, ayaqları tutulub. Bundan əlavə, bayılıb və həkim çağırıblar. İynə vurublar ki, Mehman özünə gəlsin. Mənim təkidli tələblərimdən sonra o, quru aclığı dayandırdı və maye qəbul etməyə başladı. Altıncı, yeddinci günlər orqanizmdə geriyədönməz proseslər baş verir və onun həyatını xilas etmək mümkün olmazdı. Mən onu maye qəbul etməyə və mübarizəni davam etdirməyə razı saldım. O ölməməlidir, yaşayıb öz işini davam etdirməlidir”.

O, M. Hüseynova qarşı açılmış yeni uydurma cinayət işini "görünməmiş özbaşınalıq, hüquq və ifadə azadlığının ələ salınması" adlandırıb.

"Təəssüf ki, hələlik bu repressiv akt Mehman Hüseynovun hüquqlarının pozulmasına son qoyulması ilə bağlı hakimiyyətə qarşı lazımi beynəlxalq qınaq, mühakimə və tələbi almayıb. Hələlik buna “Sərhədsiz Reportyorlar”, ATƏT-in KİV azadlığı üzrə xüsusi nümayəndəsi Arlem Dezir reaksiya veriblər. Reportyorların Azadlıq və Təhlükəsizlik İnstitutu hesab edir ki, bayram olmasına baxmayaraq, beynəlxalq təşkilatlar və demokratik ölkələrin hökumətləri növbəti repressiya aktını operativ olaraq pisləməli və Mehman Hüseynovun dərhal və qeyd-şərtsiz azadlığa buraxılmasına çağırmalıdırlar", - E. Hüseynov bildirib.

Mehman Hüseynovun atası Rafiq Hüseynov isə dekabrın 31-də "Amerikanın Səsi"nə bildirib ki, oğlunun sağlamlıq durumu çox ağırdır.

"Oğluma kömək lazımdır. Onu telefonla danışmaq üçün əllərində gətirmişdilər,” - Rafiq Hüseynov bildirib.

Öz növbəsində vəkillər Şəhla Hümbətova və Fuad Ağayev "Amerikanın Səsi"nə Mehman Hüseynovla dekabrın 28-dən sonra görüşlərinin olmadığını bildiriblər.

"Dekabrın 28-dən sonra bayram günləri başlayıb və bu günədək nə telefon vasitəsi ilə Mehman Hüseynovla əlaqəmiz olub, nə də görüş imkanı olmayıb”, - vəkil Şəhla Hümbətova "Amerikanın Səsi"nə deyib.

Vəkil Fuad Ağayev də "Amerikanın Səsi"nə eyni fikirləri bildirib: "Sonuncu dəfə dekabrın 28-də Mehman Hüsenyovla görüşmüşük. Ondan sonra onunla hər hansı əlaqəm olmayıb. Bu səbəbdən də Hüsenyovun səhhəti və durumu ilə bağlı hər hansı məlumatım yoxdur. Amma Mehman dünən ailəsinə zəng edib, deyib ki, aclığı davam etdirir. Söhbət əsnasında səhhətinin ağırlaşdığını, huşunu itidiyini bildirib. O, ailə üzvlərinə vəziyyətinin ağırlaşdığına görə ineksiya yolu ilə bədəninə dərmanlar yeridildiyini deyib. Hüseynov ailə üzvlərinin tövsiyəsi ilə su içəcəyinə söz verib”.

Penitensiar Xidmətin ictimaiyyətlə əlaqələr şöbəsinin rəhbəri Mehman Sadıqov isə yanvarın 1-də "Amerikanın Səsi"nə bildirib ki, Mehman Hüseynov qida və su qəbul edir. “Onun səhhətində hər hansı problem yoxdur. Hüseynovun vəkilləri ilə mütəmadi görüşləri təmin olunur. Eyni zamanda qanunvericliyə uyğun olaraq o, telefon danışıqlarından istifadə edir”,- M. Sadıqov bildirib.

M. Sadıqov blogerin 1 saylı Bakı İstintaq Təcridxanasına (Kürdəxanı təcridxanası) köçürüldüyünü təsdiqləyib.

Onu da qeyd edək ki, həbsdə olan bloger M. Hüseynova qarşı 2018-ci il dekabrın 26-da yeni cinayət işi başlanılıb. O, 14 saylı cəzaçəkmə müəssisəsinin əməkdaşına xəsarət yetirməkdə ittiham olunur. Bloger itthamın yalan və böhtan olduğunu bildirib. Dekabrın 26-dan etiraz olaraq quru aclığa başladığını vəkilləri vasitəsi ilə bəyan edib.

M. Hüseynov 2017-ci il martın 3-də 2 il azadlıqdan məhrum edilib. O, Nəsimi Rayon Polis İdarəsinin rəisi Musa Musayevin xüsusi ittiham qaydasında qaldırdığı iddia əsasında cəzalandırılıb - polisə böhtan atmaqda təqsirli bilinib.

Bloger həbsinin sosial şəbəkələrdə yaydığı ifşaedici videolarla bağlı olduğunu bildirib.

M. Hüseynov çəkdiyi videolarda hökumətin fəaliyyətini tənqid edib, yüksək vəzifəli şəxslərin, deputatların olduğu deyilən bəzi mülklər barədə süjetlər hazırlayaraq sosial şəbəkələrdə yayıb. Videolar geniş ictimai müzakirələrə yol açıb.

Öz növbəsində rəsmi Bakı bütün fundamental azadlıqların tam təmin edildiyini bəyan edir. Hökumət rəsmiləri insanların qanun qarşısında bərabər olduğunu, heç kimin ifadəsinə, siyasi yönümünə görə həbs edilmədyini bildirir.

Reyting.az

Ana səhifəyə dön