Dənizin dibində qədim dövrlərə aid mərmər döşəmə tapılıb

İtaliya arxeoloqları dənizin dibində əsrlər boyu su altında qalmış bir Roma villasına aid mərmər döşəmə aşkar ediblər.

Reyting.az xəbər verir ki, tapıntı qədim Bakoli şəhərində sualtı arxeoloji bərpa layihəsi çərçivəsində aşkara çıxarılıb və ərazisini su basmış Roma villasına məxusudur.

Mütəxəssislərin sözlərinə görə, bu, Baya Sualtı Arxeoloji Parkında (müasir Neapol şəhəri yaxınlığında) aparılan qazıntıların bir hissəsidir.

Yeni tapıntı barədə xəbəri "Arkeonews" nəşri yayıb.

Bildirilir ki, Baya adlı şəhər qədim zamanlarda Tirren dənizinin bir hissəsini əhatə edən Neapol körfəzinin şimal-qərb sahilində yerləşən iqtisadiyyat, mədəniyyət, turizm baxımından, eləcə də digər önəmli sahələrdə çiçəklənən qədim tarixə malik bir Roma şəhəri olub. Həmin dövrlərdə Roma zadəganlarının tanınmış nümayəndələri tez-tez buraya istirahətə gəliblər. Buna görə də şəhər dəbdəbəli villaları, termal bulaqları, hedonist atmosferi ilə imperiyada çox məşhur ərazi sayılıb.

Nəşr tapıntı barədə yazır: "Üzə çıxan Roma villasındakı bu döşəmədə müxtəlif daşlardan, mərmər parçalarından xüsusi peşəkarlıqla istifadə edilib. Eyni zamanda çox mürəkkəb həndəsi naxışların təsvirindən və dekorativ texnika hesab olunan "Opus sectile" üslubundan da yararlanıblar. Yeni araşdırmada iştirak edən mütəxəssislərin məlumatına görə, qədim Roma dövründə tikilmiş bu villanın döşəməsi Mədəni İrsin Bərpası Agentliyi (İtaliya) və "Naumacos" elmi jurnalı ilə işləyən arxeoloqların birgə əməyi sayəsində kəşf olunub”.

Mütəxəssislərin fikrincə, bu tapıntı həm də sübut edir ki, qədim şəhərlər olan Bakoli ilə Bayanın memarlıq üslubu biri-birindən fərqlənmir.

Arxeoloqlar bildiriblər ki, hər biri kiçik və eyni ölçüdə olan xırda daş parçalarından istifadə edilən mozaikadan fərqli olaraq, bu mərmər döşəmənin tikintisində "Opus sectile" memarlıq üslubuna çox bənzəyən puzzle formasında quruluşuna görə gözəl və bir-birini tamamlayan, eləcə də uyğun gələn, həmçinin böyük, diqqətlə seçilmiş parçalardan da ustalıqla istifadə olunub.

Məhz orijinal üslubuna görə qədim tikinti bir daha sübut edir ki, bunun sayəsində bina sahibinin öz zövqünün zənginliyinə və incəliyinə rəğmən sifarişi peşəkarlıqla yerinə yetirən ustalar istənilən halda bu döşəmədən daha gözəl, daha baxımlı, mürəkkəb, eləcə də bənzərsiz bir orijinal naxışlar yarada bilərdi. Elə buna görə də qədim Bayada olduğu kimi Bakoli şəhəri ərazisində də o vaxtlar yüksək texnikaya malik, memarlıq baxımından çoxlu sayda gözoxşayan binalar, xüsusilə də varlılara məxsus dəbdəbəli villalar, eləcə də böyük saraylar inşa edilib.

Tədqiqatçılar yeni tapılan bu döşəmənin 250 kvadratmetr ölçüdə olduğunu və Roma İmperiyasının son dövrlərində tikildiyini bildiriblər.

Alimlər bu qədim villa döşəməsinin artıq həmin dövrlərdən başlayaraq tikintilərdə istifadə olunan mərmərdən hazırlandığını müəyyən ediblər. Onların fikrincə, yəqin ki, bu villanın döşəməsinin bir hissəsinin mərmərdən hazırlanması həm də maddi baxımdan xərclənən pula qənaət etmək üçün edilib, çünki həmin dövrlərdə hətta ən varlı adamlar belə maddi çətinliklərlə üzləşə bilərdilər.

"Memarlıq baxımından "Opus sectile" üslubuna daha yaxın olan qədim döşəmə zərif həndəsi motivləri, həm də qeyri-adi sənətkarlıq baxımından bizə böyük tarixə malik Qədim Romanın həyatına, sənətinə valehedici bir pəncərə təqdim edir. Bu da tarixi yenidən, daha geniş, əhatəli tədqiq etmək imkanı yaradır", - Bakoli şəhəri bələdiyyəsinin başçısı Cozi Jerardo Della Racone bildirib.

Hazırda arxeoloqlar Bakoli şəhərində qədim Roma dövründə tikilmiş, ehtimala görə çox zəngin bir şəxsə məxsus olan bu villanın gözoxşayan döşəməsinin bərpası üzərində işləyirlər. Mütəxəssislər deyirlər ki, onlar səylə çalışsalar da bu döşəməni bərpa etmək məsuliyyətli və çox çətin işdir.

Oqtay QORÇU

Ana səhifəyə dön