İvan Qroznının simasının 3D rekonstruksiyası yaradılıb

Braziliyalı dizayner Sisero Morais rus çarı IV İvan Qroznının 3D formatında üzünün üçölçülü rekonstruksiyasını yaradıb. Belə məlum olub ki, çarın ortaya çıxan bu yeni təsvirinə istinad edilərsə, İvan Qroznı heç də təsəvvür edildiyi kimi zalım və qəddar simalı yox, 3D üçölçülü rekonstruksiyanın nəticəsinə görə, əksinə, yaraşıqlı, eləcə də əzələli, həmçinin mavi gözlü, boz saqqallı keçəl bir adam olub.

Reyting.az-ın məlumatına görə, Morais deyib ki, rekonstruksiya üçün Sovet dövrünün məhşur alimi Mixail Gerasimovun rus hökmdarının məzarında aparılmış arxeoloji qazıntılarda topladığı tarixi məlumatlardan geniş istifadə edib.

Braziliyalı mütəxəssisin sözlərinə görə, o, 1564-cü il tarixli “Həvari” kitabının üz qabığında çəkilmiş çar İvan Qroznının portretindən, həmçinin müasirlərinin tarixi sübutlarından da yararlanıb.

S. Morais indiyə qədər elmə mövcud olan bütün faktları, etibarlı məlumatları topladığını, daha sonra isə tarixdə zalım hökmdar kimi ad çıxarmış, üstəlik, rus xalqı tərəfindən "Dəhşətli İvan” ləqəbini qazanmış bu çarın kəlləsini, həmçinin saç və dərisini təyin etməklə İ. Qroznının üz cizgilərini yenidən, mükəmməl şəkildə qura bildiyini deyib. Dizaynerin fikrincə, əslində, gəncliyində bu rus hökmdarının xarici görünüşü fərqli olub. Moraisə görə güman ki, İ. Qroznının məhz "Uca boylu, gözəl saçlı, geniş çiyinli, həmçinin güclü əzələli və xoş sifətli" təsvir edilməsi daha çox reallığa uyğundur.

Dizayner bildirib ki, Qroznının görünüşünün bərpası prosesi onun üçün valehedici bir iş olub, çünki o, həmin ərəfədə həm də bu rus hökmdarın yaşadığı tarixi dövrü, həmçinin də çarın həyat tərzini tam dərindən öyrənə bilib.

Morais deyib: "SSRİ dövrünün məhşur tədqiqatçı alimi, rusiyalı M. Gerasimovun araşdırmasına görə, çar İvan Qroznı daha çox spirtli içkilərdən istifadə edib, həm də həddindən artıq yeməyi xoşlayan bir şəxs olub. Belə məlum olur ki, rus çarının həyatı elə də rahat və firavan keçməyib, ümumiyyətlə, o xaotik bir həyat sürüb".

Braziliyalı dizaynerin fikrincə, rus çarının bədənindən çoxlu civə izlərinin tapılması heç də onun mütləq mənada sui-qəsdə məruz qalmasından, ehtimal edildiyi kimi zəhərlənmədən xəbər vermir. "Tamamilə mümkündür ki, maddə hansısa xəstəliyin müalicəsində, çar İvan Qroznının tezliklə sağalmasını sürətləndirmək üçün istifadə olunub",- deyə S. Morais əlavə edib.

Onu da qeyd edək ki, oğul qatili olduğu söylənilən rus çarı Qroznının dəhşətli görünüşü barədə təsəvvürü çox yüksək peşəkarlıqla dəyişməyi bacaran Morais bundan əvvəl misirli fironu "canlandırıb", daha sonra isə 148 min il əvvəl yaşamış əfsanəvi "Əjdaha adam"-ın üzünü tam yenidən qurub.

Oqtay QORÇU

Ana səhifəyə dön