Enerjiyə qənaət edən göydələnlər tikilib

Norveçdə unikal asimmetrik göydələnlər inşa olunub. Yeni tikilən göydələnlər qabaqcıl enerji səmərəliliyi texnologiyaları sayəsində xarici elektrik enerjisi mənbələrinə ehtiyacı, yəni daim qoşulmanı aradan qaldırır.

Reyting.az-ın "New Atlas"-a istinadla verdiyi məlumata görə, Oslo şəhərində fəaliyyət göstərən "Snøhetta" şirkəti Norveçdə yüksək enerjiyə qənaət edən yeni binanın tikintisini uğurla başa çatdırıb. Bina xarici enerji mənbələrindən istifadə etmədən il boyu xoş mikroiqlimi saxlaya biləcək.

İnşa edilmiş "Vertikal Nydalen" kompleksi asimmetrik quruluşa malikdir, eyni zamanda bir-birinə bağlı iki qüllədən ibarətdir. Bu unikal dizayn ətrafdakı bina sakinlərinə maneə törətmədən, ətrafda olan böyük bir ərazini bol günəş işığı ilə təmin edə biləcək.

Binanın fasad hissəsi şam panelləri ilə örtülüb, müəyyən zaman keçdikdən sonra isə orijinal dəyişiklik baş verəcək, burada fasad qəhvəyi rəngi əvəz edən gümüş bir rəngə çevriləcək. Bina polad eyvanlar və klassik taxta bəzəklərlə fərqlənir.

Mütəxəssislərin dediyinə görə, bu yeni və unikal binanın daxili məkanı uğurlu təşkil olunub.

Binanın birinci mərtəbəsində restoranlar, orta mərtəbələrində ofislər və yuxarı mərtəbələrdə 40 yaşayış mənzili var.

"Snøhetta" şirkətinin məlumatına görə, onların yeni göydələni istilik, soyutma, havalandırma üçün oflayn rejimdə işləyir. Lakin buna baxmayaraq, elektrik enerjisi ilə işıqlandırma və digər məqsədlər üçün də elektrikdən istifadə hələ ki, davam edir.

Binanın xüsusi bir özəlliyi rahat şərait yaratmaqdan ötrü "Üçqat sıfır həlli"-nin istifadəsidir: geotermal enerji, eləcə də təbii havalandırma və günəş panellərinin birləşməsi.

Binanın istilik, eləcə də soyutma sistemi suyun axdığı və gil ilə beton qarışığının olduğu konstruksiyaların temperaturunu tənzimləyən dərin quyulara əsaslanır. Bu sistemin mühüm hissəsinə çevrilən istilik nasosu üçün enerji damda yerləşdirilmiş günəş panelləri tərəfindən yaradılır, həm də pəncərələrin çox olması sayəsində təbii işıq maksimum dərəcədə artır, bu da tədricən süni işıqlandırmaya olan böyük ehtiyacı get-gedə azaldır. Hava mübadiləsi üçün avtomatik olaraq işləyən mexanizmdən, yəni böyük açılışlardan istifadə olunur. Əlavə olaraq həm də, meylli divarlar hava sirkulyasiyasını yaxşılaşdırmaqdan ötrü xüsusi hazırlanıb. Yeni binanın fasadında quraşdırılmış klapanlar isə hər an lazım olduğu qədər təmiz hava axınını tənzimləyir.

Memarlıq üslubuna görə və arxitektura baxımından adi tikililərin, yəni ofis üçün nəzərdə tutulmuş binaların havalandırma sistemləri tez-tez tavanları döşəmənin səviyyəsindən bir metr aşağı endirməyə məcbur edir. Bununla belə, hava kanalları və onun tətbiqi üçün ayrı çəkilən təbii ventilyasiya sisteminin istifadəsi sayəsində əhəmiyyətli yerləri boşaltmaq mümkündür. Bu əlavə məkan isə təbii işığın miqdarını artırmaq və daha açıq bir yer yaratmaq üçün istifadə edilə bilər.

Enerji səmərəliliyini aydın şəkildə izləmək üçün "Vertikal Nydalen" kompleksindəki binalara xüsusi sensorlar quraşdırılıb. Bu, onun optimallaşdırılması üçün lazım olan məlumatları toplamağa imkan verir.

Hər ofisin masalarında QR kodlar var. Onların köməyi ilə smartfonla kodu skan etməklə işçilər onlayn platformaya keçib binanın rahatlığı, funksionallığı haqqında təəssüratlarını yaza, eyni zamanda çatışmazlıqlar barədə rəylərini söyləyə bilərlər.

"Vertikal Nydalen" kompleksi adlanan ərazini təhvil verən, həmçinin də yaşayış binaları və ofis üçün obyektlərin tikintisini ilə məşğul olan "Snøhetta"-dən bildiriblər ki, Norveçdə bir ilk olaraq inşa edilmiş bu unikal asimmetrik göydələnlər yaxın gələcəkdə də tikiləcək.