ABŞ Dövlət katibi Con Kerri Vaşinqtonda Azərbaycan prezidenti İlham Əliyevlə görüşüb.

Görüş əsnasında onlar bəyanatla çıxış ediblər.

"Mən prezident Əliyevi Dövlət Departamentində qarşılamaqdan məmnunam," – deyə Kerri bildirib."Bizim ölkələrimiz arasında ortaq maraqlar var. Biz Azərbaycana Əfqanıstandakı sülhməramlı missiyaya verdiyi töhfələrə görə minnətdarıq.”

Azərbaycanın mürəkkəb regionda yerləşdyini önə çəkən Kerri Əliyevə Cənub Qaz Dəhlizi layihəsində sərgilədiyi liderliyə görə təşəkkür edərək, bu dəhlizin Avropanın enerji təchizatında önəmli rol oynadığını bildirib.

"Bizim başqa maraqlarımızı da var – əks-terrroizm. Habelə biz Dağlıq Qarabağ dondurulmuş münaqişəsinin həll olunmasını görmək istəyirik – bu, danışıqlar yolu ilə həll olunmalıdır.”

Prezident İlham ƏIliyev isə çıxışı zamanı Vaşinqtona dəvətə görə ABŞ prezidenti Barak Obamaya təşəkkür edərək, iki ölkə arasında yaxın və mehriban münasibətlər olduğunu dilə gətirib:"Bizim aramızdakı iqtisadi əməkdaşlıq inkişaf edir. ABŞ şirkətləri Azərbaycanda $10 milyarddan çox investisisya qoyublar.”

Daha sonra Əliyev ortaq enerji layihələri və Cənub Qaz Dəhlizinin inşasından söz açıb:"Biz ABŞ hökumətinin Azərbaycanla Ermənistan arasında uzun münaqişənin həllində göstərdiyi səylərə görə minnətdarıq. Biz hesab edirik ki, bu konflikt erməni qüvvələrininin ərazilərimizdən dərhal və qeyd-şərtsiz çıxarılmasını tələb edən BMT qətnamələri əsasında həll edilməlidir.”

Azərbaycanın 100-ə yaxın sülhməramlı əsgərinin Əfqanıstanda xidmət etdiyini önə çəkən İlham Əliyev Azərbaycanla ABŞ arasında bir sıra sahələrdə əməkdaşlıq olduğunu da xatırladıb.

Qeyd edək ki,İ.Əliyev bu həftə Vaşinqtonda keçirilən nüvə sammitində iştirak etmək üçün Birləşmiş Ştatlarda səfərdədir.