Bu günlərdə filologiya üzrə fəlsəfə doktoru, Əməkdar müəllimi Zenfira Aslanın “XIX əsr Qarabağ ədəbi mühiti” adlı monoqrafiyası nəşr olunub.

Reyting.az xəbər verir ki, “Adiloğlu” nəşriyyatında işıq üzü görmüş kitabın elmi redaktoru professor Vaqif Sultanlı, rəyçiləri isə professor Sənan Səlcuq və filologiya üzrə fəlsəfə doktoru Samirə Məmmədlidir.

Müəllifin uzunillik elmi yaradıcılıq axtarışlarının bəhrəsi olan monoqrafiyanın ayrı-ayrı fəsil və bölmələrində XIX əsr Qarabağ ədəbi-mədəni mühitini fоrmalaşdıran sоsial-siyasi və kulturоlоji amillər dəyərləndirilmiş, ədəbi məclislərin pоеziyanın inkişafında rоlu, təzkirə və ədəbi tоpluların yaranması, divan ədəbiyyatı ənənələri və epik şeirin əsas inkişaf xüsusiyyətləri, yenilik axtarışları, poeziyada ictimai motivlərin və realist inikas çalarlarının güclənməsi, folklor üslubuna qayıdış, maarifçi-rеalist düşüncənin təşəkkülü, satiranın bədii ifadə imkanları kimi məsələlər sistemli şəkildə təhlil obyektinə çevrilmişdir.

Kitaba yazdığı “Qarabağın poetik mənzərəsi” adlı ön sözdə monoqrafiyanın önəmini vurğulayan professor Vaqif Sultanlı daha çox diqqəti mövzunun aktuallığına yönəldir: “XIX yüzildə Qarabağ təkcə siyasi-tarixi hadisələrin qovşağına deyil, həmçinin söz sənətinin, poetik zövqün, estetik axtarışların canlı mərkəzinə çevrilmişdir. Bu dönəmdə Qarabağ mühiti klassik Şərq ədəbi ənənələri ilə yeni dövrün sosial-mədəni çağırışlarının qovuşduğu bir məkan rolunu oynamış və bu qovuşma sonrakı yüzildə Azərbaycan ədəbiyyatının ideya-bədii istiqa-mətlərini müəyyənləşdirən əsas amillərdən biri olmuşdur. Bu mənada XIX yüzil Qarabağ ədəbi mühiti milli nəzəri-kulturoloji düşüncənin formalaşmasında mühüm bir mərhələni təmsil edir”.

Monoqrafiyada XIX yüzil Qarabağ ədəbi mühiti poeziya fonunda araşdırılsa da, müəllif yeri gəldikcə digər janrları təhlil edib, bütövlükdə bəhs olunan dövrün ədəbi-mədəni mənzərəsini yaratmağa çalışıb.

Bakıda tanınmış macar qobelen ustası Juja Perelinin "Həqiqət çərçivəsindən kənar" sərgisi açılıb.

Reyting.az xəbər verir ki, sərgi Azərbaycan Milli Xalça Muzeyində Macarıstanın Azərbaycandakı səfirliyi, Macarıstanın Mədəniyyət və İnnovasiya Nazirliyi və Qabor Kovaç İncəsənət Fondunun dəstəyi ilə keçirilib.

Sərginin açılışında giriş nitqi ilə çıxış edən Macarıstanın Azərbaycandakı səfiri Tamaş Torma qeyd edib ki, Budapeşt Azərbaycan Milli Xalça Muzeyi ilə birgə layihələri böyük həvəslə həyata keçirir.

"Onların peşəkar dəstəyi və işə sadiqliyi sayəsində biz ikitərəfli əməkdaşlığı dərinləşdiririk. Azərbaycan mədəni irsinin ən qiymətli nümunələrini qoruyan bir müəssisədə macar mədəniyyətini təqdim etmək bizim üçün böyük şərəfdir", - o bildirib.

Səfir, həmçinin Azərbaycan Mədəniyyət Nazirliyinə təşəkkür edib.

Muzeyin direktoru Əminə Məlikova qeyd edib ki, təqdim olunan sərgi Juja Perelinin fəlsəfəsini əks etdirir: "O, əsərləri məşhur Fransa şəhəri Obüssonda nümayiş etdirilən ilk əcnəbi qobelen ustası olub".

Ə.Məlikova vurğulayıb ki, muzeyin ekspozisiya zalında Perelinin müxtəlif illərdə əsasən qobelen texnikasında, eləcə də qarışıq texnikalarda yaratdığı 29 əsəri təqdim olunub.

Sərgi fevralın 28-dək davam edəcək.

"Yazıçılar teatra gəlmirsə, aktyorları ittiham eləməyə haqları yoxdur".

Bunu Xalq artisti Qurban İsmayılov deyib.

Aktyor bilirib ki, əgər hansısa yazıçı onu kitab oxumamaqda ittiham edirsə, o da onlara sual edib: siz niyə teatra gəlmirsiniz?

"Tutaq ki, İlqar Fəhmi hansısa bir əsərini səhnəyə qoyur, öz qələm dostlarını dəvət edir, gəlirlər, amma başqa vaxt beş manatından keçib gəlirlərmi? Yox. O zaman mən niyə beş manatımdan keçib sənin kitabını almalıyam? Bu tək yazıçılara aid deyil. Lap rəssamlar olsun. Söhbət əgər bir-birimizi günahlandırmaqdan gedirsə, biz də günahlandıra bilərik. Tamaşaya gəlməyən rəssam necə məni sərgiyə getməməkdə günahlandıra bilər?"

Xalq artisti onu da əlavə edib ki, aktyorlar onsuz da işlərinə görə mütaliə edirlər.

"Mən aktyoram, onsuz da bu işin içindəyəm, oxuyuram. Oynadığımız əsərlər mütaliə deyil ki? Şekspir mütaliə deyil? Stanislav Stratiyev (bolqar yazıçısı, ssenarist, - red.) mütaliə deyil? Şiller mütaliə deyil? Elə müəlliflər var ki, heç onu mənəm-mənəm deyən kitab adamları tanımır, amma mən oxumuşam, məlumatım var. Yəni nəticə etibarilə aktyor camiəsi istər-istəməz mütaliəli olur, buna görə də bizə kitab oxumurlar damğasını vurmaq olmaz"(report).

Hollivud kino sənayesində böyük nüfuz qazanmış "Universal Pictures" studiyası məşhur kinoaktyor Brendan Freyzer və aktrisa Reyçel Vaysla "Mumiya" filminin dördüncü hissəsində əsas rollarda çəkilmələri üçün müqavilə bağlayıb.

Reyting.az xəbər verir ki, bu barədə "The Hollywood Reporter" nəşri məlumat yayıb.

Hollivudun "Universal Pictures" kino studiyası həm də sosial şəbəkələrdə adı çəkilən aktyorların iştirakı ilə 1999-cu ildə lentə alınmış ilk "Mumiya" filmindən fotolarını "Ata və ana geri döndü" qeydi ilə paylaşıb.

Xatırladaq ki, Freyzer "Mumiya"nın ilk üç filmində, Vays isə ilk iki ekran əsərində rol almışdı.

Bu filmin rejissorları Mett Bettinelli-Olpin və Tayler Cillett olacaq. Yeni bölümü lentə alınacaq "Mumiya" filminin ilk nümayişi 2028-ci ilin may ayının 19-a planlaşdırılıb.

Oqtay QORÇU

Milli Məclis xarici prodüserlərin Azərbaycanda film istehsalına cəlb etmək üçün təşviqedici tədbirlər həyata keçirilməsini ilk oxunuşda qəbul edib

Reyting.az xəbər verir ki, bununla bağlı "Kinematoqrafiya haqqında" qanuna dəyişikliklər parlamentin bugünkü plenar iclasında müzakirəyə çıxarılıb.

Dəyişikliyə əsasən, xarici prodüserləri Azərbaycan ərazisində film istehsalına cəlb etmək məqsədilə filmlərin istehsalı üçün çəkilmiş xərclər qismən geri ödəniləcək.

Sənəddə təklif edilib ki, xarici və birgə istehsal filmlərinin istehsalı üçün çəkilmiş xərclərin qismən geri ödənilməsi müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada və şərtlərlə həyata keçirilsin.

Bildirilib ki, dəyişikliklər xarici prodüserlərin Azərbaycanda film istehsalına cəlb edilməsi dövlət siyasətinin ayrıca istiqaməti kimi təsbit olunur. Bu, ölkənin beynəlxalq kino bazarına inteqrasiyasına və mədəni diplomatiyanın inkişafına xidmət edir.

Diqqətə çatdırılıb ki, xarici və birgə istehsal filmləri üzrə çəkilmiş xərclərin qismən geri ödənilməsi mexanizmi bir çox ölkələrdə uğurla tətbiq olunan maliyyə təşviqi vasitəsi olmaqla, xarici investisiyaların cəlb edilməsinə, yerli xidmət sektorunun inkişafına və yeni iş yerlərinin yaradılmasına müsbət təsir göstərir.

Təklifin qəbulu nəticəsində ölkədə kinematoqrafiya sahəsində hüquqi tənzimləmə təkmilləşdiriləcək, beynəlxalq və birgə istehsal layihələrinin sayı artacaq, ölkənin kino sənayesinə xarici maliyyə və texnologiya axını sürətlənəcək, Azərbaycanın mədəni və yaradıcı potensialının beynəlxalq səviyyədə tanıdılması güclənəcək və dövlət və özəl sektor arasında əməkdaşlıq imkanları genişlənəcək.

Qanun layihəsi müzakirələrdən sonra səsverməyə qoyularaq birinci oxunuşda qəbul edilib.

Azərbaycan Yazıçılar Birliyinin üzlük haqqı yığılmasında intensivlik müşahidə edilir.

Reyting.az xəbər verir ki, bu sözləri Modern.az-a açıqlamasında Azərbaycan Yazıçılar Birliyinin Mətbuat katibi Xəyal Rza deyib.

O bildirib ki, toplanan pulların məbləği haqqında onda məlumat yoxdur: "Amma üzvlük haqqı ödənişləri son günlər operativ şəkildə yerinə yetirilir".

Təşkilatdan bildirilib ki, kənarlaşdırılan üzvlərin bərpa olunması barədə müraciətlər olmayıb: "Bununla belə çıxarılmş şəxslərin yenindən bərpa üçün müraciətini ehtimal edirəm. Təşkilata yeni üzv qəbulu daha da sərt şərtlərlə olacaq", - deyə Xəyal Rza vurğulayıb.

Qusar şəhər Uşaq İncəsənət Məktəbinə Azərbaycanın Xalq artisti Elza İbrahimovanın adı verilib.

Reyting.az-ın xəbərinə görə, Nazirlər Kabineti bu barədə qərar verib.

Mədəniyyət Nazirliyi və Qusar Rayon İcra Hakimiyyətinə bu qərardan irəli gələn məsələləri həll etmək tapşırılıb.

Azərbaycan Milli Xalça Muzeyində tanınmış macar qobelen ustası Juja Perelinin "Həqiqət çərçivəsindən kənar" adlı fərdi sərgisi açılacaq.

Muzeydən Reyting.az-a bildirilib ki, açılışı fevralın 11-də baş tutacaq sərgidə tekstil sənətinin aparıcı nümayəndələrindən sayılan Juja Perelinin dünyagörüşünü, yaradıcı potensialını və yüksək peşəkarlığını əks etdirən 29 əsəri nümayiş olunacaq.

Müəllifin ipək, yun və pambıq materialların sintezindən ərsəyə gətirdiyi qobelenlərdə insan və təbiət münasibətləri, kainat, zaman, yaddaş, əbədiyyət və s. mövzular mifoloji obrazlar və abstrakt motivlərlə üzvi şəkildə birləşdirilərək təqdim edilir.

Onun dərin fəlsəfi məzmunu, mükəmməl kompozisiyası, zəngin kolorit həlli ilə seçilən əsərlərində həm klassik Avropa qobelen ənənələri qorunur, həm də yeni materiallar, texnikalar və fərqli yaradıcı yanaşmalarla bu sənətin sərhədləri genişləndirilir.

Juja Perelinin qobelenləri maddi və qeyri-maddi aləm arasında vasitəçi rolunu oynayaraq, sözlə çətin ifadə olunan duyğuları və mənəvi reallıqları simvollar vasitəsilə tamaşaçıya çatdırır. Bu xüsusiyyətlər müasir qobelen sənətində özünəməxsus yeri olan rəssamın əsərlərinə individuallıq və ölməzlik qazandırır.

2001-ci ildə Juja Pereli qobelen sənətinin mərkəzi sayılan Fransanın Obüsson şəhərində fərdi sərgi keçirən ilk xarici sənətkar olub. Onun əsərləri müxtəlif ölkələrin muzey və şəxsi kolleksiyalarında saxlanılır.

Sərgi fevralın 28-dək davam edəcək.